Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 059,001 Auteur: Bernart de Bondeills Genre: Canso Numero: XI

Tot aissi·m pren com fai als assesis

I	1	Tot aissi·m pren com fai als assesis,
		qe fan tot so qe lurs seinhers lur di,
		qe no·n pensan failhir ser ni mati,
		tant lo crezon e tant ll'es chascus fis;
	5	e le seinhers, qar conois certamen
		qe chascus fai de grat son mandamen,
		fa·ls comensar tal re, segon q'aug dir,
		don prendon mort, ans q'o puescan complir.
II		Tot eissamen hai ieu estat aclis
	10	e fins e francs vas amor, so·us afi,
		en tot qan puec, qez anc non y failhi,
		antz totas ves outra poder m'enmis.
		e qan conoc qe ses tot trichamen
		ll'era obligatz per far tot son talen,
	15	fes mi tal re comensar don sospir
		e don breumens crei qe m'er a morir.
III		Quar veramen la gensor, q'om anc vis,
		des qe Adams fon criatz tro aici,
		et aqella qe mais ha de prez fi
	20	e de bons aibs, mi mandet qe servis
		e qe ames ab frem cor fermamen;
		et ieu com fins am l'ades finamen,
		qar anc ailhors, pos la·m mandet servir,
		no·m virei iorn ni·m virarai ni·m vir.
III	25	Car ses conten faz e farai e fis
		per vos, amors, so q·anc non fis per mi
		ni o farai, aissi Jhesus me gi,
		per tot qant anc poc aver Costantis;
		doncs pos per vos fas tan gran ardimen,
	30	ben er granz tortz si tant aul chauzimen
		aves de mi qe ia·m laisses aucir,
		pos per vos muer, e per vos puesc garir. —
IV		Garir? — breumen, si·m don dieus so q'ie·ll qis
		e·l qier encars, e doncs auiatz cossi:
	35	qe·ll gran maltrach qe nuech e iorm m'auci,
		e·l greu turmen, qe volgestz q'ieu suffris,
		mostres ades ses tot alongamen,
		a la gensor qe·m fai viure muren,
		qar, pos sabra com mueir, crei qe sufrir
	40	volra q'ieu l'am, qe ren als non deçir.
V		Chansos, si·t plai, a Point te·n vai coren
		al pro marques del Carret, q'a prez gen
		fai tot qant tainh, per q'ieu vueilh enantir
		sai entre·ls pros son prez e far auçir.
VI	45	E fora lai ab lui, so·l poiras dir,
		mas pres mi ten la res q'ieu plus dezir.