Pasero, Nicolò. Guiglielmo IX. Poesie. Modena: S.T.E.M.-Mucchi, 1973

[CdT en procés d'incorporació]

Code: 183,011 Auteur: Guilhem de Peitieu Genre: Vers Numero: [VII]

Pos vezem de novel florir

I		Pos vezem de novel florir
		pratz, e vergiers reverdezir,
		rius e fontanas esclarzir,
		auras e vens,
	5	ben deu chascus lo joi jauzir
		don es jauzens.
II		D'amor no dei dire mas be.
		Quar no·n ai ni petit ni re?
		Quar ben leu plus no m'en cove!
	10	Pero leumens
		dona gran joi qui be·n mante
		los aizimens.
III		A totz jorns m'es pres enaisi
		c'anc d'aquo c'amiei no·m jauzi,
	15	ni o farai, ni anc non o fi;
		c'az essiens
		fauc, maintas ves que·l cor me ditz:
		«tot es niens».
IV		Per tal n'ai meins de bon saber
	20	quar vueill so que non puesc aver.
		E si·l reprovers me ditz ver:
		«Certanamens
		a bon coratge bon poder,
		qui·s ben sufrens».
V	25	Ja no sera nuils hom ben fis
		contr'amor, si non l'es aclis,
		et als estranhs et als vezis
		non es consens,
		et a totz sels d'aicels aizis
	30	obediens.
VI		Obediensa deu portar
		a maintas gens, qui vol amar;
		e cove li que sapcha far
		faitz avinens
	35	e que·s gart en cort de parlar
		vilanames.
VII		Del vers vos dic que mais ne vau
		qui be l'enten, e n'a plus lau:
		que·ls motz son faitz tug per egau
	40	comunalmens,
		e·l son, et ieu meteus m'en lau,
		bo·s e valens.
VIII		A Narbona, mas ieu no·i vau,
		sia·l prezens
	45	mos vers, e vueill que d'aquest lau
		me sia guirens.
IX		Mon Esteve, mas ieu no·i vau,
		sia·l prezens
		mos vers, e vueill que d'aquest lau
	50	me sia guirens.