Pasero, Nicolò. Guiglielmo IX. Poesie. Modena: S.T.E.M.-Mucchi, 1973

[CdT en procés d'incorporació]

Code: 183,006 Auteur: Guilhem de Peitieu Genre: Vers Numero: [VIII]

Farai chansoneta nueva

I		Farai chansoneta nueva,
		ans que vent ni gel ni plueva:
		ma dona m'assai' e·m prueva,
		quossi de qual guiza l'am.
	5	E ja, per plag que m'en mueva,
		no·m solvera de son liam.
II		Qu'ans mi rent a lieis e·m liure,
		qu'en sa carta·m pot escriure.
		E no m'en tenguatz per iure,
	10	s'ieu ma bona dompna am;
		quar senes lieis non puesc viure,
		tant ai pres de s'amor gran fam.
III		Que plus ez blanca qu'evori,
		per qu'ieu autra non azori.
	15	Si·m breu no·n ai aiutori,
		cum ma bona dompna m'am,
		morrai, pel cap Sanh Gregori,
		si no·m baiz' en cambr' o sotz ram.
IV		Qual pro i auretz, dompna conja,
	20	si vostr'amors mi deslonja?
		Par que·us vulhatz metre monja!
		E sapchatz, quar tan vos am,
		tem que la dolors me ponja,
		si no·m faitz dreg dels tortz q'ie·us clam.
V	25	Qual pro i auretz s'ieu m'enclostre
		e no·m retenetz per vostre?
		totz lo jois del mon es nostre,
		dompna, s'amdui nos amam.
		Lai al mieu amic Daurostre
	30	dic e man que chan e [...] bram.
VI		Per aquesta fri e tremble,
		quar de tam bon'amor l'am;
		qu'anc no cug qu'en nasques semble
		en semblan del gran linh N'Adam.