Pasero, Nicolò. Guiglielmo IX. Poesie. Modena: S.T.E.M.-Mucchi, 1973

[CdT en procés d'incorporació]

Code: 183,008 Auteur: Guilhem de Peitieu Genre: Vers Numero: [IX]

Molt jauzens mi prenc en amar

I		Molt jauzens, mi prenc en amar
		un joi don plus mi vueill aizir;
		e pos en joi vueill revertir,
		ben dei, si puesc, al meils anar,
	5	qu'al meils or n'an, estiers cujar,
		c'om puesca vezer ni auzir.
II		Eu, so sabetz, no·m dei gabar
		ni de grans laus no·m sai formir;
		mas si anc negus jois poc florir,
	10	aquest deu sobre totz granar
		e part los autres esmerar,
		si cum sol brus jorns esclarzir.
III		Anc mais no poc hom faissonar
		cors, en voler ni en dezir
	15	ni en pensar ni en consir;
		aitals jois non pot par trobar,
		e qui be·l volria lauzar
		d'un an no·i poiri' avenir
IV		Totz jois li deu humeliar
	20	e tot'autr'amors obezir,
		midons, per son bel acuillir
		e per son bel douset esgar:
		e deu hom mai cent tans durar
		qui·l joi de s'amor pot sazir.
V	25	Per son joi pot malaus sanar,
		e per sa ira sas morir,
		e savis hom enfolezir,
		e belhs hom sa beutat mudar,
		e·l plus cortes vilaneiar,
	30	e·l totz vilas encortezir.
VI		Pus hom gensor no·n pot trobar,
		ni huelhs vezer, ni boca dir,
		a mos obs la vueill retenir,
		per lo cor dedins refrescar
	35	e per la carn renovelar,
		que no puesca envellezir.
VII		Si·m vol midons s'amor donar,
		pres soi del penr' e del grazir
		e del celar e del blandir
	40	e de sos plazers dir e far
		e de son pretz tener en car
		e de son laus enavantir.
VIII		Ren per autrui non l'aus mandar,
		tal paor ai c'ades s'azir;
	45	ni ieu mezeis, tan tem faillir,
		non l'aus m'amor fort asemblar.
		Mas ela·m deu mon meils triar,
		pos sap c'ab lieis ai guerir.