Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 063,006 Auteur: Bernart Marti Genre: Vers Numero: XIV

D'entier vers far ieu non pes

I	1	D'entier vers far ieu non pes
		ni ges de fragz non faria;
		e si fatz vers tota via
		en l'an un o dos o tres,
	5	et on plus sion asses,
		entier ni frag no so mia.
II		Aisso non creyrey ieu ges
		que lunhs vers de leujaria,
		don creys peccatz e follia,
	10	per dreg nom entier agues
		. . . . . . . . . . . . . . .
		qu'entier denant no·n faria.
III		E so quez entier non es
		ni anc no fo, cum poiria
	15	(fols hom leu so cujaria)
		que chans nom entier prezes
		qu'om de vanetat fezes?
		entiers ni fragz non seria.
IV		Foudat fai e nescies
	20	qui vers fai de truandia;
		pess'a qu'entiers ni fragz sia;
		que chanso ni sirventes
		ni'stribot ni arlotes
		non es mas quan licharria.
V	25	Selh qui faulas di (faul'es
		enteiramen lecharia),
		di, quom no s'enganaria,
		qu'entiers e sals remazes?
		non pot, que sa falsa fes
	30	lo ten fat en s'aurania.
VI		E quan canorgues si mes
		Pey d'Alvernh'en canongia,
		a dieus per que·s prometia
		entiers, que pueys si fraysses?
	35	quar si feys fols ioglares,
		per que l'entier pretz cambia.
VII		E cuja·s qu'a dieu non pes
		chans d'aital ufanaria?
		e doncx qo mals li plairia?
	40	mas no·l play, que, si·l plagues,
		tant auria·l mals conques
		qu'ab ben egal partiria.
VIII		Si peccatz era merces,
		messonia vertatz parria.
	45	e quj en sa ioglaria
		ment, e mentir non es bes;
		donc es mals, e non es res
		mas despieigz e vilania.
IX		Fols vanars es pagezes,
	50	e grans laus es pagezia,
		e fols mentirs es bauzia,
		et hom de dir ufanes
		es plus vilas que pages
		segon romans e clercia.
X	55	E selh no par ges cortes
		qui·s lauza ni·s glorifia,
		quar eys dieus nos anuncia:
		qui trop s'yssaussa, mens es
		bayssan, e selh levatz es
	60	qui segon so s'umilia.
XI		So dis, qu’om si conogues,
		e qui aisso gardaria,
		ia no·s sobrelauzaria,
		que sobre-laus folles es;
	65	e pareys be, si pros es,
		ia el mezeis non o dia.
XII		Pro sap e ben es apres
		qui so fay que ben estia;
		et es mager cortezia
	70	que sos laus es pels paes
		per autruy que per el mes,
		qu’al pobol par vilania.
XIII		De far sos novelhs e fres,
		so es bella maestria;
	75	e qui belhsmotz lassa e lia
		de belh’art s’es entremes;
		mas non cove q’us disses
		que de totz n’a senhoria.
XIV		En pauc d’ora es hom mespres,
	80	quan ditz mais que non deuria.