Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 225,009 Auteur: Guilhem de Montanhagol Genre: Canso Numero: LXIII

No sap per que va son ioy pus tarzan

I	1	No sap per que va son ioy pus tarzan
		ni fug ni gan      dompna son amador,
		pus lo conoys be per bo servidor
		senes error      en fag et en semblan;
	5	quar trop tarzar en dompney es folhia,
		que mans amicx ne ven en dezesper,
		quar pueys no·s deu dompna de ren temer,
		pus ve l'amor ses fencha e ses bauzia.
II		Bona dompna ab belh cors ben estan,
	10	vos trai enan      beutatz part la gensor,
		. . . . . . . . . . . . . . . . . . . . . . . . . . . . . . .
		pro·us fan d'onor;      per so faitz lur coman:
		valors vos ditz que fassatz ben tot dia,
		et amors vol qu'ametz, non per aver
	15	mas lo plus fi, ab qu'aya meyns poder;
		quon meyns er ricx, mais vos o graziria.
III		Triat vos ai, dompna, mi ses enian
		de bon talan      que ben gar vostr'onor,
		si cum triet si ad emperador
	20	senes temor      ia Fredericx antan;
		si eys s'i mes, quar hom tan no y valia;
		atressi·us dic qu'om mi no y pot valer,
		quar res, dompna, tan no·us ama, per ver;
		per so·us valh mais ieu qu'autre no faria.
IV	25	Ben pot chauzir dompn'un sol fin aman
		ses mal estan      son par o pauc maior;
		pero no falh, si chauzis en menor,
		si·l ve valor,      sol non pes lo baran,
		quar lo pus bas li grazis tota via
	30	mais que·l plus ricx ni·l pars, si·l fa plazer,
		per que·l deu miels don' ab si retener,
		quar mais hi a poder e senhoria.
V		Per ver vos iur, dona, e.us pliu e·us man
		qu'ieu non am tan      res cum vos, cuy honor;
	35	per que·n laissi mans belhs plazers d'alhor;
		pro y fas folhor,      mas be·m podetz aitan
		o neys cen tans esmendar, si·us plazia;
		pero huey mais vos deuria plazer.
		per que no·us platz, dompna? qu'ie·us fas saber
	40	qu'atressi·us er a far, coras que sia.
VI		N'Esclarmunda, vostre noms signifia
		que vos donatz clardat al mon, per ver,
		et etz munda, que no fes non-dever;
		aitals etz, plan cum al ric nom tanhia.