Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 230,001 Auteur: Guillem Ramon de Gironella Genre: Canso Numero: LXV

Gen m'apareill

I	1	Gen m'apareill
		de far leu chanso grazida
		d'un sonet garnida
		non ges brau ni veill;
	5	aras quan vei l'erba trida
		pels vergiers flurida,
		ieu chant ab gaug e m'esveill
		e·m luenh de la gent marrida,
		que·l cor dins me son' e·m crida
	10	c'alhor farai del be meils.
II		Gen m'esbaudisc
		per la meils encabalida,
		qui·m defen e·m guida
		si qu'ieu l'o grazisc.
	15	ar n'an tug per pauc auzida
		la maior partida.
		auias! Ben leu en fallisc!
		cug, si l'ai donx tan servida,
		va que no i fas ges faillida,
	20	ans n'ai triat mon de-meils.
III		Gen me·n destrenh,
		quar de me tan leu s'oblida,
		qu'ieu ai tan seguida
		l'art d'amor e·l genh
	25	c'autra n'agra conseguida
		graila et escafida,
		d'onrat e de ric cabtenh;
		pero, s'a lei platz ma vida,
		s'altra m'a s'amor plevida,
	30	obs l'es c'aillors serc son meils.
IV		Gen cel e tanc
		mon cor, c'a midons lerbida;
		si tot me·n envida,
		non l'auzei dir anc.
	35	lauzengeira gens aunida,
		trop es donx aizida
		d'enquerer mon fin cor franc!
		c'aitan leu m'auretz partida
		l'arma del cors ses gandida,
	40	tug sabres la vertat meils.
V		Gen mi desduelh,
		quan m'albir qu'ieu aic merida,
		des que l'aic chauzida,
		s'amor, on no·m tueill.
	45	car es de bos aips complida,
		deu esser enantida
		sa valors, s'ap si m'acueill;
		enquer er meils que d'Enida,
		can Erecs l'ac enrequida,
	50	quar mais la tem e l'am meils.
VI		Sobre-luenh, gent es garnida
		de fina valor complida,
		sol de mi·us membre un pauc meils.