Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 230,002 Auteur: Guillem Ramon de Gironella Genre: Canso Numero: LXVI

La clara lutz del bel iorn

I	1	La clara lutz del bel iorn
		e l'aura del franc termeni
		m'amenon gaug e seiorn
		per que d'un gai vers m'estreni,
	5	que·l fis iois es tals, qu'ieu meni,
		que cascuns me·n vai de torn.
II		Tals qu'es de covinen dorn,
		per cui pensan m'encadeni,
		ditz que non vol trist ni morn,
	10	per que de chant no·m refreni,
		qu'els sieus plazers pens', e peni
		quar soven lai no torn.
III		Can vei son gen cors autiu,
		on pretz fluris et afrucha,
	15	tan son sei fait agradiu
		que·l dezirs me creis e·m cucha;
		es ai ma lengua paurucha,
		tan tem que de mi s'esquiu.
IV		Be tenc per pauc essagiu,
	20	pos l'amors, qu'ieu l'ai, s'entrucha,
		si no·ill dic mon cor pensiu
		e co·m malmen' e·m trabucha;
		er leu matresducha,
		ab c'un bel semblan m'aiziu.
V	25	Huei mais be.s cove e.s tanh
		c'un pauc, si·ll platz, m'enardischa;
		e sol de mi no·s estranh,
		no·s cug qu'ieu tant m'afolisca
		que de ma boca fors isca,
	30	cals que ab mi·s n'acompanh.
VI		Prims es lo fils de l'aranlh;
		no tanh c'om prim no chauzisca,
		quan estes lai on sofranh,
		don cre qu'ieu gen me·n gandisca;
	35	e ia dieus no·l esbaudisca
		sel que fin ioi d'amor franh;
VI		Sobre-luenh encabalisca,
		cui iois e pretz no sofranh,
VII		E·l pro vescomt' enantisca,
	40	s'ill m'entenda, cui meils tanh.