Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 244,001 Auteur: Guiraut d'Espanha Genre: Dansa Numero: LXX

Dona, si tot no·us es preza

I	1	Dona, si tot no·us es preza
		de l'amor don ieu soi pres,
		autra nom pot far conqueza
		tal per qu'eu sia conques.
II	5	Car autra mon cor non denha
		ni·m platz que nuill' autra·m denh
		ni que ia a mi atenha,
		pos qu'ieu a vos non atenh;
		aital maneir' ai enpreza
	10	ab mon cor, qui s'es enpres
		en vos amar, gent apreza
		don' ab bel cors gent apres.
III		Adonx sufretz que·us destrenha,
		dona, l'amors qui·m destrenh;
	15	e, si·us platz, ma vida·n tenha
		de vos, pos la mort en tenh;
		c'aisi·s tanh, gentil corteza
		don' ab gentil cors cortes,
		que res que·us plassa, no·m peza,
	20	ni·m pot res plazer que·us pes.
IV		Mas tem que·l dezirs m'estenha
		tan c'ab un pauc no·m estenh,
		qu'ieu ai de vos, on pretz renha,
		dona; e quar lai non renh
	25	e'n vos estenc per malmeza
		ma vida, si tot mal m'es,
		prec per vostr' onrad' auteza
		sel ioi qu'el mon plus aut es.
V		Na Belengueira, largueza
	30	de gen parlar, don largu' es,
		salva son pretz, e·ill beleza
		creis valors, don plus bel' es.
VI		Bel Proensal, tal promeza
		c'anc no·m atendet, promes
	35	vostre gens cors, de que·m peza,
		e prec n'Autreiat que·ill pes.