Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 068,001 Auteur: Bernart Tortitz Genre: Canso Numero: XIX

Per ensenhar los nescis amadors

I	1	Per ensenhar los nescis amadors
		faray un chant, en que quasqus aprenda
		quals son finas ni los quals trichadors
		ni las quals fan de lur amistat venda:
	5	selhas, qu'al prim son d'amoros semblan
		e pueys si van tot ades encarzen,
		d'aquellas mou tan gran galiamen,
		per que·l fi van ves las finas duptan.
II		En dos amicx, pus que y es fin'amors,
	10	ia no·us cugetz loncx respiegz s'i emprenda,
		qu'ades vol l'us a l'autre far socors,
		quecx ponh'en so que quascuns vol que prenda;
		mas las falsas van lur terme donan,
		e fin'amors no vol alargamen
	15	ni dupta ren, tant a gran ardimen,
		ni tem maltrag ni mession ni dan.
III		Qu'ieu ai apres ben don muou la follors:
		de drut truan, que per un pauc que prenda
		leva son brui, per qu'amors pert son cors,
	20	quar non es res que tan fort la dissenda;
		qu'ayssi quo·l ferr la peira d'ariman
		tira ves si fin'amors solamen,
		e quj ia·n vol, de ben celar s'empren
		qu'enayssi·s pert o·s vay tost gazanhan.
IV	25	E non per so qu'ab los gualiadors
		guali quascus: „qui car compra, car venda‘‘,
		quar non es dans ni nulha deshonors,
		sol que de maisadenant no·s emprenda,
		quar aysselhuy que prim vay gualian
	30	es ses merce, et ab gualiamen
		es gualiatz, don hieys premeiramen,
		e·l dampnatges sobr'el mezeys s'espan.