Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 071,001 Auteur: Bernart de Venzac Genre: Vers Numero: XXIII

Ivern vey e·l temps tenebros

I	1	Ivern vey e·l temps tenebros
		que refreydis los flums, e·l glas,
		e·l arbre de frug reston blos
		tug cominal, li gran e·l bas;
	5	e non aug d’auzelhs lo trebalh,
		per qu’ieu comens, quant auzelhs falh,
		un vers, si·l puesc gitar a lutz.
II		So que sol esser sus es ios
		et apellatz savis escas;
	10	don devon esser vergonhos
		aisselh que son dels aussors gras;
		aisselh a, qui tolh cominalh
		e·l fa estar dedins serralh
		per conquerre·ls autrus trautz.
III	15	Conduytz e deportz, ioys e dos
		son tornat en: „si·t fas, faras“
		soudadiers per fag pren respos
		que „si’n folh venguist, folhs n’iras“;
		qui promessas pays, laus badalh,
	20	cum selh que viu de devinalh
		e sona·ls avers rescondutz.
IV		Ja mais non er prezatz ni pros
		negus hom per aver qu’amas;
		e si·s fai fals agutz tristos
	25	l’esperit, mals cors es el vas,
		quant es lay en aisselh brazal
		ont elh eys perpres arribalh
		sai vius: per que yest lai vengutz?
V		Prims sens fai home malginhos,
	30	guazanh enginha on perdra·s;
		semblans d’amar es tracios
		e fai so don hom elh eys pas
		orguelh pensa: „si·t vals, si·m valh‘‘,
		e non esguarda lai on salh,
	35	per que chai del tot el palutz.
VI		Propchan si vai lo iorns iros,
		que·l mons es treballatz e las,
		ples d’enjan, fals et enveyos,
		e digz e fagz tornatz atras;
	40	vengut em del gra al raspalh,
		aquo eys tem que s’anualh,
		que mais viu cals que cabellutz.
VII		Meyns an fe l’enfant que.ls pairos
		tant quant a mais en · VI · d’un as;
	45	e tu, segles qu’iest reire nos,
		ia non venhas, si aissi vas,
		ni puescas que metes fermalh
		el coms elh de te un vielh dalh
		ses colp vil ira uostr escutz.
VIII	50	Del vers es prop la fenizos;
		prec que·l mot fals en sian ras
		pel comte n’Uc en qui es dos.
		que dieus sos enemicx abas,
		e fassa d’elhs tal esparpalh
	55	on totz los vensa e·lstrebalh,
		que·l camps per el sia retengutz.
IX		Seguros ses espaventalh
		vuelh fassam d’elhs tal esparpalh
		que sia·l camps per nos retengutz.