Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 076,008 Auteur: Bertran d'Alamanon Genre: Sirventes Numero: XXV

D'un sirventes mi ven grans voluntatç

I	1	D’un sirventes mi ven grans voluntatç
		ce·l fas’ausir a tutç cominalmen,
		e qu’ieu dirai de las grantç poestatç,
		de cells que·s an de l’enperi conten,
	5	c’al mieu senblan il regnan folamen
		e·l papa, car los ten e balansa;
		be·m meravegll car igll an esperansa
		ques a nengun en fas’ autregiamen,
		puois c’el a d’els renda d’aur e d’argen.
II	10	Al papa val l’enperi e·l regnatç
		mais ce sc’era tutç sieus domeniamen,
		car plus monta l’avers c’es presentatç
		per acest plai a lui e a sa gen,
		ce li renda ce us enperaires pren;
	15	e puois d’aver n’a tan gran aondansa,
		no mi sembla ce gia i met’ acordansa,
		ces ell non a en alre son enten,
		per ce lo monç n’es tutç e turbamen.
III		Gia aices platç non er sentençiatç.
	20	puois ce li rei uolon abreuiamen,
		ab cavaliers et ab cayals armatç
		e ab vasals bos de concerimen
		vegna cascus apoderadamen,
		e en un canp fasan un’aital dansa
	25	c’al departir gasagne l’uns l’onransa;
		puois decretal no·i noseran nien,
		puois troberan lo papa bendisen.
IV		Aicell sera fil de dieu apelatç
		ci aura faic al camp lo vensimen;
	30	pe-los clerges er leu coronatç,
		car il veran c’aura·n l’afortimen;
		adonc seran tut a sun mandamen,
		car ades an clerge aital uçansa
		ce, can trobon pairo de gran puisansa,
	35	tut cant il vol fan ben e umilmen
		e puois sun dan, quanveison ce deisen.
V		E si als reis so c’ieu lur dic non plaç,
		als podon far, ces er miels per un sen,
		ces outramar si pert crestiandaç,
	40	e s’i pason apoderadamen,
		remanra tot so de c’om los repren;
		e autresi pases lo reis de Fransa;
		el an primers ses longia demoransa,
		e·l reis Gaumes, qu’a l’astr’e l’ardimen
	45	dels serasis mescre gens d’autra gen.
VI		Assas ai dic a cascun, si m’enten,
		dels autç princes, e ai ferma speransa
		ce, s’il pasan ses longia demoransa,
		cristiandat garderan d’aunimen,
	50	gaçainhan dieu e pres e salvamen.
VII		Reis castelans, car soberanamen
		est soiberans de fin preis et d’onransa,
		donas vos suoign, segner, qu’ieu ai dutança
		ce vostre pres non prenna mermamen,
	55	e faitç, segner, ce·l tengas autamen.
VIII		Dell papa sai, ce dara largamen
		pron del perdon et pauc de son argen;
IX		e s’outra mar non fan seccors breumen,
		li terra·s pert ses tot revenimen.