Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 257,001 Auteur: Izarn Rizol Genre: Canso Numero: LXXVI

Ailas! tan suy pessius e cossiros

I	1	Ailas! tan suy pessius e cossiros
		de pessamen, d'ira e de mal saber,
		quan mi membra·l ioys qu'ieu soli'aver,
		e·l gaugz entiers e·l solatz amoros,
	5	qu'ay tot perdut per mon folh nesciatge,
		qu'anc no·l saubi gardar ni car tener,
		ni pueys non ayc de me mezeis poder
		que anc mos sens pogues amar alhondre!
II		. . . . . . . . . . . . . . . . . . . . . . . . . . . . . .
III	17	Mas tant li suy forfaitz e nalechos
		per que no·m vol escoutar ni vezer;
		e suy aissi tornatz e non-chaler
	20	que re no fatz ni dic que·m sia pros
		ni contra lieys que no·l sia salvatge.
		aucir mi pot e far son bon saber,
		quar yeu non l'aus far tornas ni mover,
		pot ben lo sieu destruir e cofondre.
IV	25	E quar conoys qu'autre ioys no.m es bos
		ni d'autr'amor non ai cor ni lezer
		ni puesc alhors anar ni remaner,
		mi fai estar marrit e vergonhos.
		e si·m tornes en son franc senhoratge,
	30	pogra·m tostemps fin e lial aver;
		et agra·n pro, si·l vengues a plazer
		qu'elha·m denhes escoutar e respondre.
V		E s'ieu n'agues ni solatz ni respos
		ni ren qu'a lieys denhes en grat cazer,
	35	agra·m estort ab aitan de voler
		d'una dolor que·m ten, dona, per vos,
		que s'afortis aitan en mon coratge
		e·m fai tan fort sospirar e doler,
		meravil me cum puesc en pes tener,
	40	si·m feblezis e·m fai tremblar e fondre.
VI		Bona-Esmenda, a vos ten ma chansos,
		quar comensatz tan be lo dreg viatge
		de gran valor e de pretz mantener
		qu'anc malvestatz en vos no poc caber
	45	ni nulhs mals ayps acostar ni apondre.
VII		Ben comensatz e ben faitz aparer
		de proeza quo la vulhatz tener
		e que·us gardetz del lays de la yrondre.
VIII		Los motz e·l so lais en vostre poder,
	50	Bon'-Esmenda, e digatz me·n lo ver,
		si se·n fai res a moure ni apondre.