Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 273,001b Auteur: Jordan Bonel de Cofolen Genre: Canso Numero: LXXVIII

No·n estaray q'un vers non lays

I	1	No·n estaray q'un vers non lays
		say sus, enans que plus mi tays;
		e ponhatz tug al retener,
		qu'ieu me·n yrai, e ben leu mays
	5	no·n auria tan de lezer.
II		Per un arden trazen que·m trays,
		m'a si sazit ira et esmays,
		no puesc durmir, quan vauc iazer,
		qu'a lonjas n'ay sufert lo fays,
	10	et es me greu al sostener.
III		Longua promessa m'es huei mays
		tan: que no te·m coven ni plays;
		ni so qu'ieu tenc no cug tener;
		e ges per aisso no·m biays
	15	ni de totas no·m desesper.
IV		Qu'un'amor ai, per qu'ieu suy guays,
		tal que anc no menti ni frays;
		ni ves autra non dis anc ver;
		per qu'ieu seray tostemps verays
	20	e servir l'ay a mon poder.
V		Aquest'amors m'alegra e·m pays,
		lanquan floris la roza e·l glays;
		e non puesc auzir ni saber
		quom ia per autr'amor engrays,
	25	tan la vuelh bayzar e tener.
VI		Tant suy de lieys glotz e lecays,
		per pauc no muer, quan non la bays;
		mas no·n ai ges tan de lezer,
		que·l gelos braus ianglos di lays,
	30	que sabra tot nostre voler.
VII		Ben es ara en gran pantays,
		s'elh tan o te que yeu me·n lays,
		quar no mi pot far remaner
		ab tot quant a truesc'a Roays,
	35	en Ynglaterra ni oltra mer.
VIII		Tostemps melhura e creys mays
		nostr' amors, no·n pot remaner.