Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 282,003 Auteur: Lanfranc Cigala Genre: Canso Numero: LXXX

E mon fin cor regna tan fin'amors

I	1	E mon fin cor regna tan fin' amors
		qu'eu chantarai, si tot s'espan freidura,
		c'om no i deu agradar autras flors
		ni chanz d'ausels ni foilla ni verdura,
	5	mais ioi d'amor; doncs d'amor, qui·m ten gai,
		farai chanson, que bona razo n'ai;
		e qui·s voilla, fassa chanson o dansa
		de chanz d'ausels, quar eu no·n ai voler
		de far chanson mas d'amoros plazer,
	10	que ses amor no fon anc benanansa.
II		E si solatz es faiditz pels maiors
		ni leialtatz non reingna ni drechura,
		anz tenon cort cobeitaz et errors
		per lo conseill d'orgoill ab desmesura,
	15	ges per aisso de chan no·m laissarai,
		que·l dan qu'es granz, acreisser non s'eschai;
		e s'il fan mal, il n'aian la pezanssa,
		qu'eu no·n mier mal ni no i vuel part tener,
		anz vuel chantar d'amor e ioi aver
	20	de qu'eu mi lau, e del mais ai fiansa.
III		E·m meravil de totz los clamadors
		que·s van claman d'amor ni·n fan rancura,
		car entre totz los corals amadors
		non fo anc us, miels ames ses falsura
	25	con ai amat et am et amarai;
		es ad amic adoncx amors esglai,
		sentit n'agr'eu em fag o en senblanssa,
		tant loniamen m'a tengut en poder,
		mas anc iorn no·m fes amors doler,
	30	anz m'a totz temps faig viur' en alegransa.