Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 082,004 Auteur: Bertran Carbonel Genre: Canso Numero: XXIX

Aisi com sel que·s met en perilh gran

I	1	Aisi com sel que·s met en perilh gran
		ab son aver per talan d’enrequir,
		e·ls mals que·n a li·n aven a sofrir
		per lo guazanh que en vay esperan,
	5	o ai ieu fach, dona, c’ai dat a vos
		lo cor e·l cors com a la pus plazen
		e que val mays, per que ieu muer viven
		sufren grans mals, mai si a vos plagues,
		ric et iauzen me pogra far merces.
II	10	E si merces no mi tras del afan
		qu’ieu trac per vos, don ai pieitz de morir,
		vos falhires, mas non devetz falhir
		ni desmentir lo vostr’ umil semblan,
		e mais, c’aitan cant es pus cabalos,
	15	senher, can falh, mays fai de falhimen,
		e cant el falh ves los sieus maiormen;
		e doncx, pus ieu soi vostres, vos fares,
		dona, peccat, s’ab vos no·m val merces.
III		E s’ieu ai dich o dic re malestan,
	20	dona, ves vos, dreitz no me·n deu punir,
		c’amors o fai, a cuj no·m puesc gandir
		qu’ieu per forsa non fassa son coman,
		que tant es fortz que·l pus fort met de ios;
		e fin’ amors non a esgardamen
	25	e nulha res, mas que sec son talen
		e son voler, per qu’ie·us prec me valgues
		ab vos, dona, fin’amors e merces.
IV		Dona, l’autrier vos dis tot mon talan
		e l’amor gran qu’ieu vos ai ses mentir,
	30	et anc respost negun non puoc auzir,
		per qu’ieu marritz m’aney abandonan
		co·l naus, cant pert los albres e·ls timos,
		que vay travers vas terr’ ab lo fort ven,
		e motas vetz dieus la dutz salvamen
	35	dedins bon port; atressi, dona, es
		de mi, qu’ieu muer, s’ab vos no·m val merces.
V		E pus que vos, don’, aves de ben tan,
		ies no·m deves mos humils precx fugir,
		que·l grans senhers se fai ·M· tans grazir,
	40	can entrels ricx vai lo paur’ escotan;
		e s’ieu no soi tan ricx ni poderos
		com aperte, don’, al vostr’ onramen,
		je·us servirai mielhs que·l ricx per · I · C ·
		car servizis aerguelh nom plai ges,
	45	per qu’ieu vos prec que mi valha merces.
VI		Gentils dona, merceyan quier respos,
		e merceyan quier merce humilmen,
		car per merce esperi guerimen
		e per merce ioy entier ab totz bes;
	50	valha me doncx, plazens dona, merces.
VII		Al bon, al larc, al savj et al pros
		comte vai dir de Rodes humilmen,
		chanso, c’ab tu lo mieu cors li prezen
		per dir, per far son plazer totas ves,
	55	e vira lo, si me gueris merces.