Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 082,005 Auteur: Bertran Carbonel Genre: Sirventes Numero: XXX

Aisi com sel que trabuca e peza

I	1	Aisi com sel que trabuca e peza
		soan mesclat ab bos deniers de pes,
		. . . . . . . a mi la semblan sotileza
		genhs e volers de far un sirventes
	5	de vils motz, car non lo poiria
		faire tan vil com tanheria,
		car tant es vils sel per qu'ie·l fas, per ver,
		que anc nulhs homs pus vil no·n poc vezer.
II		Tant es malvais e ples de gran vileza
	10	e de no-fe aquest vils, c'uey non es
		nulhs homs, pogues comparar la falseza
		que a en si, que, si far si pogues
		c'om al pus fals la senhoria
		dones, aysi co·l pros l'auria
	15	davan los pros, l'agr'aquest ses querer
		denan los fals; per sert o fas saber.
III		E car blasmes, tro c'om mostra serteza,
		es laus de sel c'om blasma, mantas ves,
		trairai guirens, per tal que hom mi creza,
	20	qu'estiers no vuelh que blasmatz sia ges:
		deman hom, en cal part que sia,
		lo pus vil de la canongia
		de Marselha; aissi·s pot enquerer
		cals es aquest, si res a de saber.
IV	25	E s'alcus ditz que aissi a primeza,
		e que nulhs es c'ab aitan so saupes,
		an en la cort del vescoms — sa maleza
		es saubuda lay — on sabr'a pales.
		lay se sap co fay dreita via
	30	et on esta·l sieua clersia;
		aisi prec dieus que·l puesca dechazer
		com el se vay bos ni honest iazer.
V		Ai, deslials, ples de deslialeza
		e ples d'enian, mais franhen per un tres
	35	can te falsas, que nulhs laycx, per nobleza,
		car a dieus as mays que nulhs laix promes;
		perjurs, que fas? s'aisi·n partia
		t'arma, pensa te on tenria!
		s'om se salva per aul vida tener,
	40	tug t'irem per corsans requerer.
VI		A sels que cassan eretgia
		e de clercx tota malvaizia,
		vils sirventes, iras fair'a saber
		c'un canorgue s'an layssat fals per ver.