Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 082,006 Auteur: Bertran Carbonel Genre: Canso Numero: XXXI

Aissi m'a dat fin'amors conoissensa

I	1	Aissi m'a dat fin'amors conoissensa
		com natura la don'a esparvier,
		qu'en nulh albre somni far non l'aiensa
		mas el pus bel et en lo pus entier
	5	et el mielhs fach, al cal l'adutz natura;
		aisi m'a fach per ma bon'aventura,
		bela dona, en vos amors chauzir
		com en sela c'om mas be no·n pot dir.
II		E doncx ben dey far de mon ioj parvensa,
	10	mas non ges tan, que li fals lauzengier
		puescon saber qu'ieu vos port bevolensa
		ni qu'ieu de vos, don', aia dezirier;
		mais vuelh murir qu'ieu tan greu forfaitura
		fezes ves vos; seguir vuelh la dreitura;
	15	amar vuelh so, gardar et aculhir
		que amors vol, et tot l'alre fugir.
III		Ja iois m'agra, segon ma conoissensa,
		fag conoiser, si·m saupes per parlier,
		ni dat a vos? ni apres la sabensa
	20	de far chanso, s'ieu vostre pretz entier
		be non gardes? mas yeu d'als non ai cura
		mas d'amar vos lialmen ses falsura
		e de gardar, per nostr'amor cobrir,
		que negun mal no·n puesc'om prezumir.
IV	25	Aisi, dona, co yeu dic, ses falhensa
		vos ai amad' e·us am de cor plenier;
		mas tan m'aura dat fin'amors temensa
		de dir a vos, que, qui·m des Monpeslier,
		no·n parlera, qu'ieu truep en l'escriptura
	30	c' Ovidis dis qu'ieu feira desmezura;
		pero ar vol qu'ieu vos o deya dir
		et vos preguar qu'ieu vos dey' abelir.
V		Per qu'ieu, dona, prec que merces vos vensa
		et que m'ames, que mot m'a gran mestier;
	35	aiso veyas e non vostra valensa;
		per dieu, dona, donatz me·n alegrier;
		no·m tengua dan s'aiso vos par rancura,
		que fin'amors, sapchatz, mi ten en cura
		et en poder, e dey la obezir,
	40	e maiormen, car no me·n puesc partir.
VI		Chanso, vay t'en lai on fins pretz s'atura,
		so es midons, que ieu am ses falsura,
		que lli plassa qu'ieu l'am e la dezir,
		c'amors no vol de pus o deya dir.