Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 124,012 Auteur: Daude de Pradas Genre: Canso Numero: XL

Nom puesc mudar que no·m ressit

I	1	Nom puesc mudar que no·m ressit,
		pus l'aura freida venta e corr,
		alques de ioy, e per amor
		e pel temps que vey amarzit,
	5	qu'auzelhs non chanta em plaissat
		ni·l boscs non retin doussamen;
		mas ieu ai tan lo cor iauzen
		qu'aisi·l prenc, ont ylh l'an laissat.
II		E pus l'iverns nos tol l'estat
	10	e·l fregz encaussa lo temps gen,
		ben dey aver esbaudimen
		ab lo gen chan qu'ai comensat,
		qu'atretan val, cuy es aizit,
		un petit de ioy ab freydor,
	15	cum longu' amistatz em pascor,
		quan tug l'avol so·n replenit.
III		Totz temps viuran li acropit
		e·l fals becut lauzeniador,
		que·s fan de domnas guardador,
	20	per que·l effan son abordit;
		aquist an paratge baissat
		ab aquel lur dompneyamen;
		mas qui·n pendia mil o cen,
		a dreg auria dieus venjat.
IV	25	Ben sai qual son li enjanat,
		qu'a per pauc no·n dic mon talen,
		qu'a dreg son coguos e sufren
		silh, qui plus se·n fan veziat;
		que donas e drut e marit
	30	tug volon esser amador;
		si per aquo son peccador,
		paucx n'i a que sion guerit.
V		Ia non creirai que dieus oblit
		bon drut ni belh dompneyador,
	35	si per autre peccat maior
		pus colpable non l'a cauzit;
		que·l mal e·l be son tug iutgat
		e quasqus ha son iutgamen;
		per tal seran al querimen
	40	li fals perdut e·l fin trobat.
VI		Al cor et a la voluntat
		conoys dieus home finamen;
		e si·l volers nos s'i cossen,
		totas e tug em encolpat;
	45	quar so que dieus vol, es gequit
		(e·l sobreplus reten paor),
		si·l mals talans no vai alhor
		e·l bons no reman sai, que·ns guit.