Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 167,021 Auteur: Gaucelm Faidit Genre: Canso Numero: XLVIII

D'un dotç bell plaser

I	1	D'un dotç bell plaser
		plasent
		movon miei cant ver
		valent
	5	gient;
		car si mos solatz
		platz
		als ben credentç,
		ni s'ieu be
	10	fas re,
		de midons me ve,
		cui ne soi grasire.
		liei desire
		si c'alhor
	15	mon desir no vire,
		car lieis am e lieis ador
		e causisc per la meglior.
II		Sol al sieu voler
		m'atent,
	20	car del sieu saber
		aprent
		sen
		tal don m'es donatç
		gratç
	25	pels plus conoisentç.
		tant gent me
		mante,
		la sua merce,
		car soi bos sofrire,
	30	ce gausire
		soi d'amor,
		don giausentç consire;
		et anc a nul amador
		non avenc tan de ricor.
III	35	E fas so parer
		soen,
		car del clar dutç ser
		giausent
		pren
	40	consirier amatç —
		fatz
		soi e pauc sofrentç,
		car en ffre
		no·s te
	45	ma boca, per ce
		tagn, las, q'ieu·m n'asire,
		can m'albire
		sa valor;
		effols trop pot dire. —
	50	soi donc fols, s'ieu dic m'onor? —
		oc, se·l ditz torn' a folor.
IV		Com gia·m det poder,
		enten
		q'ieu ages leser
	55	disen
		len
		los bes ce·m a datç. —
		patç! —
		sofren clan las dentç. —
	60	no·t sove,
		ce sse
		part drutç, si no cre?
		trop potz uer asire —
		voll·m aucire,
	65	si·m socor,
		cill cu soi servire?
		ni morai, si·n dic lausor? —
		oc, si·l dit no·l an sabor.
V		Ben dei doncs temer
	70	tement;
		pero leis c'esper,
		grasen
		ren
		merces dels onratç
	75	latç
		de ce·m fes presentç.
		e ssap, se
		no·m ve,
		tan li ai lial fe
	80	c·el cor la remire,
		e·n sospire
		de dolor
		e·n trauc greu martire,
		car del tornar ai paor
	85	que·m tegna per mentidor.
VI		Pot li doncs caler
		s'ieu ment? —
		hoc, gia·t vol veser;
		vai t'en!
	90	fen
		totç altres pensatç
		natç
		de flacs pensamentç! —
		crer me te
	95	cove;
		vau duncs, giois mi me
		si que·n deia rire. —
		e no·t tire,
		chanso; cor
	100	tost, ses escondire,
		a·n Sobira, mon segnor,
		cui pretç pren per valedor.
VII		N'Agout aus eslire
		e·n Plus-avinent, c'ap lor
	105	acap bon preiss e valor.