Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 167,048 Auteur: Gaucelm Faidit Genre: Canso Numero: XLIX

Per l'esgar

I	1	Per l'esgar
		del temps clar,
		can la brun'aur' e·l freitç
		a destreitç
	5	los adreitç
		auseletç de cantar,
		s'esbaudeia
		mos coragies,
		car salvagies,
	10	plens d'enueia
		ai estat
		tant c'om me·n ten gia per fat.
II		Esmendat
		e donat
	15	m'a amors ben e gient,
		per ce·l ren
		merces cen;
		qu'en aiso ai proat:
		chi feuneia
	20	es foudatges,
		bons usages
		qui merceia,
		c'ab merce
		conqier drutç, si no·s recre.
III	25	C'amors ve
		e sap be
		qui·ll es verais o fals;
		er corals
		fins lials
	30	amics a cui conve,
		cals qu'en seiha
		sos parages;
		dreetç viages,
		on qu'esteia,
	35	lo condui,
		de fina amor, c'es ab lui.
IV		Tant d'autrui
		gioi non fui
		enveos, ce·m quges
	40	ni·m penses
		ce gia·m des
		amors so qu'er m'adui
		e me·n pleia
		segnoragies.
	45	els mesagies,
		ce·m autreia
		qe concis,
		ai tal gioi, cor, don tu ris.
V		Mos Estuis
	50	volgra vis
		lo gasardon qe·m fai
		amors sai,
		ce·m ten gai;
		e mos Linhaures fis,
	55	quer, no·m creiha
		nuls damagies;
		e·l rics gages,
		crei, ce·m deia,
		e·l gens dos,
	60	esser saubutç per els dos.
VI		Ma cansos
		an vais vos
		amia, lai on etç,
		pel ric pretç
	65	que avetç,
		esters grat dels gelos,
		a cui greiha
		vasalages,
		e·l lignagies
	70	lur sordeiha,
		ce no·m par
		a i ben pro en lur gardar.
VII		Hon que seia
		mos estages,
	75	le coragies
		s'asopleia
		ab cor clar
		vas n'Agout, qe non a par
		d'acabar
	80	so c'a preis s'escai a far.