Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 189,003 Auteur: Granet Genre: Canso Numero: L

Fis pretz e vera beutatz

I	1	Fis pretz e vera beutatz
		ab totz los bos ayps que i so,
		m'enqueron de far chanso;
		e pus tan gent en suy mandatz,
	5	ben deu esser mos chans triatz
		de tot chantar, quar chant de la melhor;
		doncx ben es dreitz que l'autre trobador
		estion tug sotz mi de ben trobar,
		pus sobre totz estauc de ben amar.
II	10	Totz iorns am mielhs desamatz
		lieys cuy vuelh mais en perdo
		servir qu'autr'ab gazardo;
		qu'ieu me tenc per gazardonatz
		per lieys, cuy aug dire que·l platz
	15	qu'ieu sia sieus, e·m esfortz ab valor
		de lieys servir per respieit de s'amor;
		e fis amicx, pus es en luec tan car,
		ben deu fis ioys de sidons esperar.
III		Sitot m'estauc trop lonhatz,
	20	ades suy en sa preyzo;
		et anc hom mais pres no fo,
		no volgues esser desliuratz;
		mas ab tal liam suy liatz,
		quon plus m'estrenh, mil tans m'an de sabor
	25	li mal que·m fay, quar de fin pretz la flor
		am e dezir, qu'el mon la volc formar
		dieus de bontat e de bos ayps ses par.
IV		Lo cors es gras e delgatz,
		la car' ab plazen faisso
	30	fresqua e vermelh'a razo,
		blancha plus que neus sobre glatz;
		e val mais, a lau dels presatz,
		no la·n podon pro lauzar lauzador,
		quar qui ben ditz, mielhs creys en sa valor
	35	dizen del be, e no·s pot comparar
		ab son gen cors nulhs laus per mielhs lauzar.
V		Pus aissi·m suy acordatz,
		fassa mi amor o no;
		qu'ab fin cor tota sazo
	40	crey be que sap ques es vertatz
		que per lieys suy turmentatz;
		e si·m vol far iauzen, salvan s'onor,
		en ioy plazen tornara ma dolor;
		e si·s n'estrai per sa honor salvar,
	45	prenga l'estraire en luec de donar.