Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 206,003 Auteur: Guilhem d'Autpol Genre: Pastorela Numero: LV

L'autrier a l'intrada d'abril

I	1	L'autrier a l'intrada d'abril
		per la doussor del temps novelh,
		per gauch del termeni gentil
		m'anava sols per un pradelh;
	5	en un deves prop d'un cortil
		trobey pastor' ab cors yrnel;
		vestida fon d'un nier sardil
		ab capa grizeta ses pelh;
		bella es e genta;
	10	s'amors m'atalenta,
		tant es covinenta;
		e fes un capelh
		de flor ab menta;
		de motos a trenta;
	15	sola si contenta
		iost' un arborelh;
		ab si meteyssa dish: „ay!
		sola suy e·l temps se·n vay;
		lassa! be planc ma ioventa,
	20	quar non ay amic veray.“
II		Yeu, que vi son gay cors barnil,
		saludiey la, quar mi fon belh,
		et elha·m respos tost e vil,
		cossi fos dona de castelh:
	25	„ioglar, vos qu'avetz sen sotil,
		trobatz qui·us onre ni·us apelh?
		anc pueys qu'amors perdet son fil,
		pretz non ac valor ni capdelh;
		ans s'espaventa
	30	falsa gens manenta,
		s'om gays lor prezenta
		solatz ni sembelh.
		be·n suy dolenta,
		s'anc n'estiey iauzenta,
	35	d'amor, que·m turmenta
		de ios mo sagelh.
		de ben amar no·m partray,
		ni per tan no·m layssarai
		qu'en totz plazers non cossenta
	40	a mon amic, quan l'auray.“ —
III		„Na toza, pros et avinens
		etz, e faitz de mi vostre drut!
		qu'ie·us seray leyals e temens,
		e ia per mi non er sauput;
	45	e far vos ay nous vestimens,
		quant aja mon rossi vendut;
		e ia negus vostre parens
		no sabra don vos er vengut.
		gans e sentura
	50	per bon' aventura
		vos port de mezura
		ab frontal crocut;
		e si·l temps dura,
		auretz vestidura
	55	de bruneta escura;
		mais, si dieus m'aiut,
		autras ioventas no·n port,
		mas d'aisso·us conort
		que d'amic seretz segura.“ —
	60	„senher, et yeu o vuelh fort.“ —
IV		„Joglar, grans es l'esernimens
		qu'ie·us vey, et ay ben conogut
		que, s'ieu complis vostres talens,
		ia no·us agra de miey perdut;
	65	e sitot s'es l'aculhimens
		belhs ni·us ay gay solatz tengut,
		s'ay marit, no m'autreya·l sens
		qu'ieu ia·l fassa per vos cornut;
		qu'ieu non ai cura
	70	d'amic ses dreitura,
		on peccatz s'atura
		de mala vertut;
		ans, se melhura
		mos faitz, en dossura
	75	no·m fara fraitura·
		l temps qu'ay despendut,
		que fraire Johans ditz fort
		que delietz engenra mort;
		yeu sent mi casta e pura,
	80	per que·n faria a dieu tort.“ —
V		„Na toza, si dieus mi perdo,
		trop sabetz mais de Cato,
		qu'ieu no say plus greu fazenda
		que servir ses gazardo.“ —
VI	85	„Senher, be sabem quals so
		falsas promessas ses do,
		qu'ieu non ai cor que·us don renda;
		e faitz alhor vostre pro!“