Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 216,001 Auteur: Guillem Fabre Genre: Sirventes Numero: LIX

Hon mays vey, pus truep sordeyor

I	1	Hon mays vey, pus truep sordeyor
		aquest segle, per qu'ieu l'azir,
		ab mais d'engan, ab meyns d'amor,
		sem de vertat, plen de mentir,
	5	mal e felh e salvatge;
		quar tric e prim en falsetatz,
		enveyos d'autrus dos donatz
		e d'autruy heretage
		son lo pus d'aquelhs qu'er vey natz,
	10	per que·l mons es en mal mesclaz.
II		Joy e deport, pretz e valor
		vezem pauc en luec enantir,
		quar pauc son li pro valedor
		a cuy platz donar e complir
	15	valens faitz d'agradatge;
		mas maldizens vezem assatz
		e reprendens pel mon levatz,
		qu'apellan nesciatge
		cortz e bobans e dos honratz
	20	e lauzan aiustar rictatz.
III		Per so li fals reprendedor
		qu'amortan be lauzan fallir,
		son appellat cossellador;
		e silh que·ls degran mielhs delir,
	25	crezon pus lur lengatge,
		quar lur cossellan cobeytatz;
		quar ylh an tals las voluntatz
		que leu sego·l viatge,
		per qu'es lurs fals mestiers montatz,
	30	quar es pels ricx trop autreyatz.
IV		Anc non crec de pretz ni d'onor
		Alexandres, segon qu'aug dir,
		per trop tener thezaur en tor,
		mas quar volc ben dar e partir
	35	lo sieu de gran coratge,
		don totz hom fazi' abrivatz
		e voluntiers totz sos mandatz,
		mostran manh vassallatge;
		quar quj ben fes, bes l'era datz,
	40	per que·l mons fon sieus conquistatz.
V		Comte, rey et emperador
		volon crestiantat perir,
		e mesclan s'i nostre rector,
		silh que degran mielhs departir
	45	del mon lo gran folhatge;
		mas er vey que pauc say's prezatz
		lo faitz de dieu, que·ns a formatz,
		quar s'obra per outratge
		cujan desfar devas totz latz,
	50	non gardan dreytz ni lialtatz.
VI		Per dieus, si totz los regnatz
		del mon davatz ad un iustatz,
		non crey qu'el vostr' estage
		laissus . . . . . . . . . em patz,
	55	si·l n'era . . . . . . . . . datz.