Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 216,002 Auteur: Guillem Fabre Genre: Sirventes Numero: LX

Pus dels maiors princeps auzem conten

I	1	Pus dels maiors      princeps auzem conten
		say entre nos, enquer tenran a frau
		li menscrezen, meyns de guerra, suau,
		lo sancte loc on dieus pres nayssemen,
	5	per que salvamen
		det a sos amicx;
		don penran destricx
		tug li amador
		de nostre senhor,
	10	si'n desamor ven la fe,
		don ys saus paguanesme.
II		La desamors      s'aferma e ss'empren
		si que l'us reys cuyda tener la clau
		d'afortimen e l'autr' a·l contraclau,
	15	que a poder e ric cor d'ardimen;
		mas l'aiustamen
		que fan, e·ls prezicx
		degran als mendicx
		que son en error,
	20	virar, ad honor
		d'aquelh senhor que nos fe,
		per guazanhar sa merce.
III		Ar em el cors      on veyrem man paren
		l'us vas l'autre encaussar per esclau;
	25	pueys al colpar ab felh cor mal e brau
		et esvazir veyrem maynt guarnimen,
		si dieus doncx no y pren,
		qu'es nostres abricx,
		tal cosselh que·ls ricx
	30	torn totz en amor;
		pueys do entre lhor
		sen e voler que desse
		passon lay, si quo·s cove.
IV		Aitals calors      de gran adyramen
	35	non es plazens a dieu ni o congau,
		quar cobeytatz ab erguelh s'i enclau,
		et empachiers es de passar breumen
		lai on pres vilmen
		dieus mort per aficx
	40	de menscrezens tricx,
		don sofri dolor
		lo ver creator
		cruzel, ab qu'elh nos desfe
		lo dan de qu'eram tug ple.
V	45	Selh qu'es rectors      pauzatz en regimen
		de nostra fe, n'a d'aitan gran deslau
		quar, pus lo mielhs del mon que hom mentau,
		li obezis, no mandet crozamen,
		ans qu'est mesclamen
	50	fos ni·l segl'enicx,
		sobrels fals mendicx
		que teno·l sanctor,
		quar tug li melhor,
		per que l'ira se mante,
	55	crey qu'er foran lai em be.
VI		Vers dieus, per follor
		en vostra doussor
		nos fizam tan e merce
		que de ben far no·ns sove.
VII	60	Clar-esguar vey flor
		de vera valor,
		per qu'ieu non ai ioy de re
		mas quan de lieys me sove.