Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 299,001 Auteur: Matieu de Caerci Genre: Planh Numero: LXXXVI

Tant suy marritz que no·m puesc alegrar

I	1	Tant suy marritz que no.m puesc alegrar
		per re qu'auja ni veja sotz le tro,
		per chant d'auzels ni per lays ni per so
		. . . . . . . . . ni per temps belh e clar;
	5	ans tota gens privada·m par estranha
		e totz mos gaugz maiers mi par corrotz,
		quar fallitz m'es lo melher reys de totz
		per pretz complitz de tota bona manha,
		per qu'en ira·m son mudat mey plazer;
	10	e pus que·m vol aissi·l mortz dechazer,
		es ben razos que ioya me sofranha.
II		Joya·m sofranh e dols mi vey sobrar,
		e no trop re que·m fassa be ni pro,
		quan mi sove del bon rey d'Arago;
	15	ladoncx mi pren fortmen a sospirar
		e prezi·l mon tot atrestant quom fanha,
		quar ylh era francx, humils, de paucx motz
		e de grans faitz, si que sobre·ls reys totz
		que hom aya ia trobatz en Espanha,
	20	era plus altz per valor conquerer;
		e pus que·l reys tant sabia valer,
		razos requer que totz le mons se·n planha.
III		Totz le mons deu planher e doloyrar
		la mort del rey per drech e per razo,
	25	quar anc princeps negus melher no fo
		el nostre temps de sa ni de la mar,
		ni tant aya fach sobre la gent canha,
		ni tant aya eyssausada la crotz
		on Jhesus Cristz fon pauzatz per nos totz.
	30	Ay ! Aragos, Cataluenha e Serdanha
		e Lerida, venetz ab mi doler,
		quar ben devetz aitant de dol aver
		cum per Artus agron silh de Bretanha.
IV		Ges Bretanha no.s pot enquers calhar
	35	que no·s planha per un rey que ac bo;
		ayssi planh yeu son cors e sa faysso
		e·l avinent aculhir e·l parlar
		del noble rey, si que pels huelhs si banha
		tota ma fatz aissi com si era dotz,
	40	quar ylh era vaysselhs complitz de totz
		bos ayps. e reys qui tans de bes gazanha
		en sa vida, deu portar e tener
		apres sa mort corona, per dever,
		ab si una et autra que·ns remanha.
V	45	La corona que.ns rema, figurar
		se deu ayssi, qui drechamen la espo:
		per lo cercle qui torna de viro,
		se deu bona fama significar,
		pels traversiers valors ab sa companha,
	50	pels quatre claus qui la fermon de sotz,
		·IIII· vertutz, per que resplan reys totz,
		so es merces cuy drechur' acompanha,
		e largueza ab natural saber;
		l'altra so es karitatz ab esper
	55	e fes, que res no destruy ni gavanha.
VI		Mortz, pus no.t puesc destruyr' e gavanhar
		ab cruzels faitz, se vals ab brau sermo
		te vuelh maldir, quar m'as le cor fello
		fait per totz temps, quar say venguist trencar
	60	l'arbre don ey gran raso que·m complanha;
		e te, vida, no pretz mays una notz,
		quar t'as layssat tolre·l melhor de totz
		qu'om sabia, per qu'est d'avol barganha,
		quar la on tu mais deurias poder,
	65	layssas tostemps ton alt no . . . premer
		a la vil mort, cuy Jhesus Cristz contranha.
VII		En l'an mile, qui ben los sap comtar,
		que Jhesus Cristz pres encarnatio,
		·CC· e mays ·LXXVI· que so,
	70	le reys Jacmes el sete kalendar
		d'agost feni; donc preguem que ss'afranha
		Jhesus a luy e·l gart del prevon potz
		on dieus enclau les angels malvatz totz,
		e·lh do los gauchz en que l'arma·s refranha,
	75	e·l corone e·l fassa lay sezer
		en selh regne on non a desplazer,
		quar aitals locx crey que de luy se tanha.
VIII		A tota gens don eyssampl'en paucx motz:
		le reys Jacmes es apellatz per totz,
	80	e dieus a.l mes ab sant Jacm'en companha,
		quar l'endema de Sant-Jacme per ver
		le reys Jacmes feni, qu'a dreyt dever
		de dos Jacmes dobla festa·ns remanha.
IX		Matieus a fait per dol e per corrotz
	85	son planh del rey qu'amava mays que totz
		les altres reys, e que totz hom se·n planha,
		e que·l sieus noms puesqua el mon remaner,
		e que·n puesca dels filhs del rey aver
		e dels amicx plazers en que·s refranha.