Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 330,017 Auteur: Peire Bremon Ricas Novas Genre: Canso Numero: XCVI

So don me cudava bordir

I	1	So don me cudava bordir,
		m'a amors a certas tornat,
		qe·m fai amar outra mon grat
		liei, ce no m'o degna grasir;
	5	antç car si ten ce no·m asir,
		me cugia gient aver pagat,
		e no·s pren garda del pecat
		ce·n aura, si·m laisa murir.
II		Mout m'es greu l'afans a sufrir,
	10	car anc mais non avi'amat,
		e tenc feses me·n per castiat,
		s'una ves me·n poges partir.
		mout mi sap gent enfolittir
		amors, puois l'uogll m'agron mostrat
	15	lo sieu bel cors grail' e dalgat,
		ce·m fai tot d'enveia langir.
III		E donc per ce me vol aucir
		ma domna, ni·m ten en viltat?
		car sol m'a de nien levat
	20	e car mon sen no·l puosc gandir?
		ma s'om poges sun cor aucir,
		leu agra·l mieu mort e laisat,
		car aduc m'a e la foudat
		de c'ieu planc e plur e sospir.
IV	25	Bella dousa don', al venir
		auc dir ce son romieu baisat,
		mas ieu n'ai man san-cors sercat,
		c'anc no mi puoc esdevenir;
		non es gient c'ieu no me·n albir
	30	for sel e ce trop falsetat;
		pero non ai tant engignat
		c'amors me·n feses anc giausir.
V		Mas ancar non soi al fenir,
		ce merces anb umilitat
	35	m'o pot aver leu restaurat,
		si·m degna midon sovenir;
		si fara, ce no·n deu faglir,
		mas antç n'aurai sent ves plorat;
		mas dieus non vol desesperat,
	40	per c'ades atent e desir.
VI		Canson, en Calabron vai dir,
		cui bos pres a per sieu triat,
		que pos qe ac son cap levat,
		non . . . . . . . . .