Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 339,001 Auteur: Peire Duran Genre: Canso Numero: C

Amors me ven asalhir tan soven

I	1	Amors me ven asalhir tan soven
		per que no·m puesc virar vas autra part
		ni·l dos cossir non puesc partir de me,
		ans, can me muer, ne dizi mai de be,
	5	e lai on pus ne fas mais de mon dan,
		adoncx me truep pus ferm senes engan
		vas sela res a qui me so donatz,
		qu'es caps e flors de beutat, so sapchatz.
II		S'anc de s'amor me destreis, ar m'ensen
	10	pel bel conort que·m dis, qu'ieu no·m regart
		de la bela, que non es ses merce,
		car dieus no volc que de lieis falhis re,
		ans l'a donat bon pretz e sobiran
		sobre totas, per qu'ieu sofri l'afan,
	15	e mans d'autres ne fas estar iratz,
		car lur demans ni lur bes non li platz.
III		Anc pus la vi, non agui tot mo sen;
		tan duramen me crema·l focx e m'art,
		bona dona, c'a sazos s'endeve
	20	qu'ie'n angoisi e·n estau mortz, so cre,
		tro vostr' amors me vai gen ressidan
		e·m dis aital qu' „eyssamen mor aman
		la flors del mon, que vos tan deziratz,
		e levatz sus, qu'eyssamen es amatz.“
IV	25	Per vos o dic, on ai mes mon enten,
		car enaissi co·l leos o leupart
		es sobransiers ad animal autre,
		vostra ricors sai que sobra ancse
		totas beutatz; doncx, dona benestan,
	30	e vieus e mortz farai vostre coman;
		e can dels huelhs vos serai alonhatz,
		prec vos, sieus plai, dins el cor me veyatz.
V		Adoncx mi leu, que del maltrag no.m sen,
		e soplei vos, don fas mon estandart,
	35	e prec amors, e dirai vos de que:
		que m'aussia o que·m prend'a merce.