Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 363,001 Auteur: Peire del Vern Genre: Canso Numero: CIX

Ab lial cor amoros

I	1	Ab lial cor amoros,
		dona, soi vas vos aclis,
		e soi vos enaisi fis
		c'amar vos vuelh en perdos
	5	mais que autra que·m des so qu'ieu volria.
		e doncx, dona, per chauzimen vos sia
		que·us sapcha bo, e me·n fassatz semblan,
		car ieu vos am lialmen ses enian.
II		El cor vey vostras faisos
	10	e·l dos esgar e·l bel ris,
		e non dezir . . . . . . .
		. . . . . . can pes de vos.
		pero·l pessars no·s ne part nuech ni dia,
		ans es pus ferms, on qu'ieu an ni m'estia;
	15	e can me cuch de vos anar lunhan,
		ades m'estatz, bona dona, denan.
III		Per qu’ieu sai que poderos
		no seria que iauzis
		lunh’ autra ni que·m partis
	20	de vos, qu’ieu am en perdos,
		com mais ne vey d’autras, vas on que sia.
		pero conosc e sai que fas folia;
		mas fin’amors non garda pro ni dan
		lai on be vol demostrar son talan.
IV	25	Tant ai sofert talan rescos
		c'amicx no·m es tan vezis,
		depus m'amor m'enqueris,
		qu'ieu ia pueys sos amicx fos.
		e sel l'afan. pero si ioi n'avia,
	30	bona dona, trop mielhs lo selaria;
		e soi selatz, don', e savis d'aitan
		que qui no·m pot valer, no·m tenra dan.
V		D'aitan serai ieu ioios,
		don', ab que dels huelhs vos vis
	35	e ia sol no·us descobris
		mon lial cor temeros;
		e ia nulh temps pus, dona, no·us querria,
		c'als no·m n'eschai; pero mais ne volria,
		e si amors me autreyava tan,
	40	del sobrepus for' al vostre semblan.