Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 377,001 Auteur: Pons de la Garda Genre: Canso Numero: CXII

De chantar dei aver talan

I	1	De chantar dei aver talan
		per ioi de lei, que vol ma conoisensa,
		c'ades dei voler de mon chan,
		sia volgutz et ausitz en Proensa,
	5	que ben conosc c'a las donas agensa,
		et ai·n en mon cor ioi tan gran
		per que iauzen chantarai darenan.
II		Per honor ai sufert afan;
		. . . . . . . . . . . . . . . . . . . .
	10	c'om en re no pot aver dan,
		pos gent onratz n'es, a ma conoisensa,
		qu'ieu ai tan aut poiada m'entendensa
		que m'es grans honors, com que·m n'an,
		quar sol sufer qu'ieu s'amor li deman.
III	15	Per so l'am ieu per bona fe
		de mon poder, si dieus me benezia;
		e l'amors durara·m iase,
		pos a vos platz que·us am, ma bel'amia. —
		amigua·us clam? dieus vueilla que vers sia.
	20	don', amigua m'es vos, so cre,
		pos tot lo ioi me das qu'ieu ai ab me.
IV		Qui la·m mentau, tals iois me.n ve,
		mos amicx es totz hom que re me·n dia,
		e vueill l'en ins en mon cor be;
	25	mas no·l aus mostrar meillor partia,
		ans fauc semblan que d'autre ioc me ria.
		e s'ieu de parlar me refre,
		lai tenc lo cor on n'aug retraire re,
V		Ab lei, que m'a fag tan d'onor
	30	que bon me·n es lo parlars e·l dezire,
		e bon, quan pens de sa valor,
		e quan la vei, meillor qu'ieu no sai dire,
		qu'ieu soi plus bels, quan sa beutat remire;
		e car ia tenc mos hueils aillor,
	35	per trop temer ho fauc e per paor.
VI		Tostemps m'aun fait lauzeniador
		mal et enuei, damidieus los azire!
		trops n'i a mals, mas un en sai peior,
		c'aisel me vol de tot en tot ausire;
	40	mas bon conort n'ai, quan ve mo consire,
		c'anc per lauzengiers bon'amor
		no vim faillir; mas no rema en lor.