Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 380,001 Auteur: Pons Santolh de Tholoza Genre: Planh Numero: CXIII

Marritz cum homs mal sabens ab frachura

		So es us planchs que fes Pons Santolh de Tholoza d'en · G · de Montanhagol, lo qual · G · avia sa seror per molher.
I	1	Marritz cum homs mal sabens ab frachura
		viurai hueymais de be ab marrimen
		. . . . . . . . . . . . . . . . . . . . .
II		Quar non se . . . . . . que pauc dura,
	10	d'est mon no y ai nulh ferm perpauzamen,
		que la defalh on pus om s'i atura
		e l cuj'aver complit a son talen.
		doncx, las caitiu! cum puesc aver enten
		que negus gaugz mais me conort viven?
	15	pus vos etz mortz, senher, que tota gen
		que·us vic, vos planh, si·us fai dieus honor pura;
III		Quar purs e bos, atempratz per mezura,
		plazens a totz (so qu'en paucx se conten),
		cum savis hom, adreitz, totz en drechura,
	20	fazens tot so qu'ensenhavatz de sen,
		visquetz el mon, so qu'ensenhetz, fazen,
		et yssample de viure sanhtamen
		nos detz a totz ab vostre complimen
		de sciensa nobla, ferma e segura.
IV	25	Segurs caps fos e paires per drechura
		dels trobadors e complitz bonamen;
		et es devers e razos per natura,
		quan lo caps dol, van li membr' afeblen;
		doncx, quan mor, par qu'elh mueyran eyssamen;
	30	doncx ab vos mor grans sabers vos siguen,
		e n'a de cors e d'arma salvamen,
		e sens entiers, conoyssensa e mezura.
V		Amezuratz cum nobla creatura
		endreg de dieu fos say e de la gen;
	35	e sembla be que dieus hi mes sa cura,
		quan vos formet, qu'elh e·l mons engalmen
		son d'un voler quecx ab se vos aven;
		mas dieus o fai cum: qui mais pot, mais pren;
		pero tanh, quar nulla res non defen
	40	a dieu lo sieu, ni deu, s'a so'n drechura.
VI		Dregz drechuriers, dieus dignes, merces pura,
		non drechuran mas humils humilmen
		vos clam, quar mais ab vos qu'ab re s'atura,
		e quar etz totz merces, per chauzimen,
	45	qu'en paradis sanht aparellamen
		de corona de vida dignamen
		l'aparelletz e·lh detz revestimen,
		si·us platz, de celestial vestidura.
VII		Maire de dieu, regina resplanden,
	50	per vos resplan lo mons de salvamen,
		qu'ans que dieus fes en vos avenimen,
		er'al segle salvatios escura.
VIII		Per merce·us prec qu'est vostre ben-dizen
		regardetz si cum vostra creatura.