Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 396,003 Auteur: Raimon de Castelnou Genre: Canso Numero: CXXI

De servir a bon senhor

I	1	De servir a bon senhor
		pot hom venir a gran be,
		per qu'ades sier la melhor,
		e nulha vetz. no·m recre
	5	de far so que l'agensa,
		que la bona entendensa
		qu'ella m'aduy e·m atray,
		mi ten ades a faire so que·l play.
II		E tenc m'o a gran honor,
	10	quan puesc far ni dire re
		qu'a lieys sol aya sabor.
		pero non fas lo cente
		que tanh a sa valensa,
		quar sabers e sciensa
	15	m'i falh; mas ges no·m esmay,
		qu'elha·m pot ben donar so qu'ieu non ay.
III		E si'lha·m val ni·m secor
		a far so qu'en grat li ve,
		per metr' avan sa lauzor,
	20	al sieu eys ops o rete.
		e dona, quan comensa
		a faire mantenensa
		a son amic, qu'a veray,
		deu li·n far tan que·n valla tostemps may.
IV	25	E.l amicx ab gran temor
		et ab leyal ferma fe
		suefra en patz la dolor
		e·l maltrag, si li·n ave.
		tant port obediensa
	30	e ferma benvolensa
		a lieys, qu'enaissi s'eschai,
		quant en dompna es sal quant qu'om en fay.
V		Per qu'ilh m'a per servidor,
		quar nulha non a ab se
	35	tan de pretz ni de valor
		ni d'amor ni de merce
		ni de ditz de plazensa
		e de belha parvensa,
		e d'aver belh solatz guay
	40	passa totas selhas qu'ieu vey ni say.
VI		De na Jauzida mi play
		quar de tot ben del mon a·l mielhs e·l may.