Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 396,004 Auteur: Raimon de Castelnou Genre: Canso Numero: CXXII

Entr'ira et alegrier

I	1	Entr'ira et alegrier
		m'estau rizen e ploran
		si cum selh que mor aman,
		quar un'amors, qu'en mi renha,
	5	mi ten destreg iauzion,
		que m'enriquis e·m cofon.
II		Mietz morts vau per un semdier,
		mas mas iuntas e doblan,
		ves lieys torsen e dressan;
	10	e no sai qual part mi tenha,
		qu'en quascuna si rescon
		so que·m te plus deziron.
III		Siey belh dig frag et entier
		mi van prenden encaussan
	15	si cum fals fi ses enjan.
		ab mout subtil entresenha
		mi vai ponhen prim preon;
		e si tot ditz, non respon.
IV		Al sieu gent cors ufanier
	20	venc de ginolhos denan,
		mas mas iuntas merceyan,
		que, s'a lieys platz que·m retenha,
		no vuel plus en aquest mon,
		sol dieus mi gart del segon;
V	25	Qu'ieu no y vuel ia parsonier,
		ni dreit non a i pauc ni gran,
		qu'ieu suy totz a son coman,
		ben volens qu'autra non denha,
		qu'ab sola lieys que·m aon,
	30	non dupti neys l'aurion.