Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 404,008 Auteur: Raimon Jordan Genre: Canso Numero: CXXIV

Quan la neus chai e gibron li verjan

I	1	Quan la neus chai e gibron li verjan,
		dey mielhs chantar que quan la flors s'espan,
		qu'en tal amor ai virat mon demor
		que·m tolh esmay e·m te guay e prezan
	5	per sol l'esper qu'ay d'un ioy, que·m sofer.
II		Mas a per pauc no·m suy laissatz de chan
		per la falsa que·m trazic ab enjan;
		e mostret hi a las autras mal for;
		mas a ssa part en retenc l'ant' e·l dan
	10	e tal blasme don ia ses lieys non er.
III		Per so la lays e·ls covens li desman,
		qu'en mi non a part ni dreit ni deman,
		qu'a plus valen do et autrey mon cor,
		e s'a lieys platz que·l prend'en son coman,
	15	be·m fai amors l'esmenda que·l cors quer.
IV		Mas la belha non sap ges mon talan,
		qu'ieu no·l aus dir ni no·l n'ai fag semblan;
		mas be sapcha per ver que·l sieus hom mor,
		si no·m acorr e·l dezir no·m eschan;
	20	e quar dic tan, ia no·l sia de fer.
V		Per aisso·m vauc de s'amor conortan
		quar non a cor camjador ni truan;
		e per so crey que n'issirai azor,
		quar paupres hom se met tant en afan
	25	qu'ab gent servir bon guizardo enquer;
VI		Qu'ieu·lh serviray huey mais, cossi que m'an,
		e serai li leyals e ses enjan
		mielhs qu'Elena no fo al frair Ector;
		e s'a lieys platz, mon servir no·m soan,
	30	qu'anc non amet Hero tant Leandier.
VII		Guari, huey mais servirai de bon cor
		a tal domna que no cug que·m enjan,
		et atendray del guizardo quals er.