Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 404,009 Auteur: Raimon Jordan Genre: Tenson fictive Numero: CXXV

Raymon Jordan, de vos eys vuelh apendre

I	1	Raymon Jordan, de vos eys vuelh apendre
		quo·us es laissatz de solatz ni de chan.
		ia·us soliatz en dompneiar entendre,
		tan lonjamen — so faziatz semblan —
	5	vo·n fenhiatz e·us en faziatz guays;
		mas eras vey que fenitz es lo lays;
		encolpatz n'es, si non es qe·i responda.
II		Amors, huey mais deg be ab vos contendre,
		mas vos eyssa m'escometetz d'aitan,
	10	e cug vos be d'aisso tal rayzon rendre
		que ia no·us er honors ni benestan:
		qu'en vos servir mezi totz mos essays,
		vos menes me cum fai selh que·l sieu trays,
		on hieu peri si cum la naus en l'onda.
III	15	Iratz paretz, Raimon, al mieu reprendre,
		mas non es vers, que que·us anetz guaban,
		qu'anc us dels mieus fos trahitz per atendre.
		be tenh per mieus selhs que fan mon coman,
		e non son mieu silh en cuy enguans nays;
	20	. . . . . . . . . . . . . . . . . . . .
		ans m'es tan greu que no sai on m'esconda.
IV	22-28	Amors d'aiss . . . poiretz d . . . ni morir . . .
		uostres . . . quous . . . enjan . . . retz ia . . .
		quils s . . . coyta d . . .
V		A par . . . . . . . . . . . . . coissendre,
	30	Raimon Jorda, de tot fait ben estan,
		qu'ie·us en feira lo cor enquer essendre
		d'un dous dezir, que·us donera aman,
		que·us en feira tal esmenda ab un bays
		que feniratz totz aquestz tortz e mays,
	35	don tostemps fos la boca iauzionda.
VI		Veiatz, amors, si poiretz far dissendre
		en vos merce, ans que·m prometatz tan,
		que mos afars en seria trop mendre,
		si·m teniatz el dezir del autr'an.
	40	en cor m'ave qu'a vos forsar me lays,
		mas guaratz vo·n que no vo·n segua plays
		don estes trop la boca dezironda.
VII		Raymon Jorda, ges aissi d'un eslays
		non pot esser acabatz tan grans fays,
	45	enaissi leu cum s'es vouta l'ironda.