Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 404,010 Auteur: Raimon Jordan Genre: Canso Numero: CXXVI

S'ieu fos encolpatz

I	1	S'ieu fos encolpatz
		ves amor de re,
		molt estera be
		qu'ieu fos malmenatz;
	5	mas on mielhs fauc sos comans,
		pert los datz al premier lans;
		on plus vos suy aclis et amoros,
		dona, muer ses ochaizos;
		e mas ab vos no puesc merce trobar,
	10	no sai on la·m an cercar.
II		Ben conosc assatz
		que ges no·us cove,
		per qu'ab bona fe
		vos m'era donatz,
	15	qu'anc mielhs senes totz enjans
		non amet negus amans.
		mas pauc mi val mos esfors contra vos,
		per qu'ieu n'estauc rancuros,
		qu'ab gen servir et ab merce clamar
	20	vos cugiey apoderar.
III		Mas vey que no.us platz
		qu'ieu vos clam merce.
		pus a far m'ave,
		part me·n totz forssatz,
	25	qu'anc tan perilos afans
		no fo ni dolors ta grans
		com merceyar lonjamen en perdos;
		e si no·m falhis razos,
		ia no·m pogra — tan m'es greu a durar —
	30	dona, de vos dessebrar.
IV		Totz acosselhatz
		me suy d'una re,
		e pliu vos ma fe,
		que mielhs me·n crezatz,
	35	qu'al plus qu'ieu poiray abans
		totz los vostres bos enans;
		e mas tant es vostre cors orgulhos
		que mos preyars no·us es bos,
		remanh ab tan, que no·us en puesc forsar
	40	ni no·us vuelh far azirar.
V		Mas molt suy iratz,
		et ai dreit per que,
		quar ieu am tam be
		e no suy amatz.
	45	mas moltas vetz val soans
		mais que tals se fai prezans.
		remazutz suy sols e de tot ioy blos;
		et m'es greu pels enujos,
		que·n auran gaug; e poira avenhar
	50	que·l dous lur torne en amar.
VI		D'uns mal essenhatz
		parliers senes fe
		ai gran guerr' ab me;
		mas ab vos solatz
	55	n'ay, cuy fan plus belhs semblans;
		mas molt es paucs lo mieus dans
		vas lo vostre, tan seria anguoyssos;
		mas tant es cortez' e pros
		per que·us sabes, dona, de lor celar,
	60	e bos pretz fai domna guardar.
VII		A'n Guari man qu'ieu aus huey mais chantar,
		qu'ab mi eys m'ave estar.