Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 404,013 Auteur: Raimon Jordan Genre: Canso Numero: CXXVII

Vert son li ram e de fuelha cubert

I	1	Vert son li ram e de fuelha cubert,
		e·l rossinhol aug chantar el dezert
		autet e clar, per que retint la barta,
		que sobr' auzels apar lo sieus chantars,
	5	e·l pretz midons es sobr' autras plus clars,
		per que mos cors no·m ditz qu'ieu ia me·n parta.
II		Grans es lo ioys que de lay mi revert,
		per qu'en s'amor ay mon cor fort e cert,
		quar ben conosc qu'ab mal gienh non s'yssarta,
	10	ans es ves mi sos talans ferms e clars,
		per qu'en s'amor er tostemps mos pensars,
		e per aisso fassa·m metr' en sa carta.
III		Si·m tenon pres li sieu belh dous esguart,
		non ai poder que·m vir vas autra part,
	15	qu'anc pueys mos cors no camget s'esperansa.
		mas era·m son tan li dezir cregut
		que re no sai cum sion sostengut,
		si per merce ylh no·m fai amparansa.
IV		E pus li platz que.m retenh'a sa part,
	20	a lieys mi do liges ses tot reguart,
		que ia d'aquo non aja mais duptansa
		qu'ieu ia mon cor de lieys biays ni mut,
		enans l'am mais, s'ela·m guart ni m'aiut,
		no fes Andrieus la reyna de Fransa.
V	25	D'ir' e d'esmay, donna, m'aves estort
		pel bon coven on ai tot mon conort,
		que, quant esguart la vostra gran valensa,
		hieu velh la nueg, quan deuria durmir,
		e pens soven si pot esdevenir
	30	que vos m'aiatz tan granda benvolensa.
VI		Fals lauzengiers, dieus prec que.us guart de mort,
		quar si pocsetz, agratz mi fait gran tort,
		mas era·m platz la vostra malvolensa,
		qu'ades vos vey e secar e languir,
	35	quar ma dona mi denha aculhir
		e quar li platz qu' amors ves mi la vensa.
VII		Mos Guaris vey qu'ades melhuyr' e gensa,
		et ieu prec dieu que·m lais esdevenir
		qu'a mon Bon-cor puesc' una nueyt servir,
	40	que d'autr'amor sol non ai sovinensa.