Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 446,002 Auteur: Lo Trobaire de Villa-Arnaut Genre: Sirventes Numero: CXXXIV

Un serventes nou, q'om chan

I	1	Un serventes nou, q'om chan,
		farai en est leugier so,
		qe corage e talan
		n'ai e mout bona raço,
	5	quar mant dizon veiramen
		qe·l dalfins pert per non-sen
		Gapenses;
		ez er granz merces
		si·l ven meschasenza,
	10	qar prez no·ll agensa.
II		Pretz e valors fui tot l'an
		del comte dalfin Gigo.
		cor vulpilh temen d'enfan
		a, o ell l'a el talo.
	15	mas siei baron son valen;
		qe·il valon, sera breumen
		tot conqes
		ço qe tout li es
		lai de part Durensa,
	20	si no·n fai bestensa.
III		Si·l dalfins çai ven ugan
		ni l'aduçon siei baro,
		mant elm, mant escut, mant bran,
		mant ausberg, mant confano
	25	e mant bell cavall corren
		veirem, mant qairell bruien
		trais espes,
		mant colp demanes
		ferir, si no i tensa
	30	le coms de Proensa;
IV		Qar, si·l coms si fai enan
		per intrar en teneso,
		cobrar pot senes tot dan
		e ses massa e ses basto
	35	so q'an perdut loniamen
		sei amic e sei paren,
		q'as un tres
		seran totas ves,
		si be·l fai valensa
	40	l'eletz de Valensa.
V		Nozasech, al mieu semblan
		aures en brieu de saço
		socors de Proensa gran,
		q'a nostre comte sap bo
	45	del vostre comensamen,
		qar de grat e de talen
		aves pres
		fach q'er a cap mes,
		qar qi ben comensa,
	50	razos es qe vensa.
VI		N'Agoutz, ab bon prez valen
		creis qec dia e non deissen
		nullas ves
		vostra valors, q'es
	55	aussors e qe gensa
		qec iorn a presensa.
VII		Serventes,
		vai tost e no·t pes,
		fa mi en sovinensa
	60	·l comte de Proensa.