Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 461,167 Auteur: Anonyme Genre: - Numero: CLIII

Mos corages m'es chaniaz

I	1	Mos corages m'es chaniaz,
		car mains aim que ne solie,
		ne ia no·m plaist l'amistaz
		de negune q'el mun sie,
	5	s'altresi non plaiz la mie;
		si voldrie,
		s'estre poguez, c'a toz altres amanz
		fous altresi chaniaz cor et talanz.
II		Donne, se vos m'amavaz,
	10	volenters vos amerie;
		se m'amistaz non vos plaz,
		non credaz gins q'eu m'ocie;
		nonporcant, se vos plaisie,
		mei plairie
	15	por voz valors, k'orguelz et li bobanz
		qui es en vos, non fous vers mei si granz.
III		Fins amis enamoraz
		sui de vos, coi que ie die,
		ne ia d'autre non credaz,
	20	qan mais vos en iurerie;
		mais iriez per ialoisie
		dic faunie,
		can sui chariaz d'ire et de mals talanz.
		bella donne, si·us plaiz, non me seit danz.
IV	25	Toz iere desesperaz,
		cant el me dist qe ferie
		alques de mes volentaz,
		si que ia ne me·n plaindrie;
		ai dex, kals merces serie,
	30	se·l faisie!
		c'ostat m'areit d'ire et de mals talanz,
		ou ai estat por li mais de · II · anz.