Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Code: 248,051 Auteur: Guiraut Riquier Genre: Pastorela Numero: X

L'autrier, trobey la bergeira d'antan (1262)

I		L'autrier, trobey la bergeira d'antan;
		Saludei la, e respos mi la bella,
		Pueys dis: « Senher, cum avetz estat tan
		Qu'ieu no·us ai vist? Ges m'amors no·us gragella? »
	5	— « Toza, si fa, mai que no fas semblan. »
		— « Senher, l'afan per que podetz sufrir? »
		— « Toza, tals es qu'aissi m'a fag venir. »
		— « Senher, et yeu anava vos sercan. »
		— « Toz', aissi etz vostres anhels gardan. »
	10	— « Senher, e vos en passans, so m'albir. »
II		— « Toz', al prim jorn fuy vostres, ses mentir,
		Pueys del vezer m'an tout afar aizina. »
		— « Senher, aital vos puesc ieu de mi dir,
		Qu'aissi quo vos m'es fis, vos suy ieu fina. »
	15	— « Toza, be·m plai quar o sabetz grazir. »
		— « Senher, si fas tot aissi com s'eschai. »
		— « Toza, vulhatz donc tot so qu'ieu volrai. »
		— « Senhe·l voler vostre vuelh ben auzir. »
		— « Toza, que vuelh de vostr'amor jauzir. »
	20	— « Senher, faitz o lai on no seray. »
III		— « Toza, nulhs joys ses lo vostre no·m plai
		D'autra del mon, ni dar no li poiria. »
		— « Senher, aquo es aissi quon ieu sai;
		Mas cavalgatz e tenetz vostra via! »
	25	— « Toza, no vuelh anar; ans dissendrai. »
		— « Senher, que·us val er quan etz dissendutz? »
		— « Toza, sapchatz que serai vostres drutz! »
		— « Senher, si·us plai, entendetz que·us dirai. »
		— « Toza, digatz tost, que be·us entenrai. »
	30	— « Senher, sejam que ben siatz vengutz. »
IV		— « Toza, tan m'es le deziriers cregutz
		De vos jauzir, qu'ades coven a faire. »
		— « Senher, quo·us es tan tost dessovengutz
		Le vostre Belhs-Deportz? No l'amatz gaire! »
	35	— « Toza, si fas, tant que ja so vencutz. »
		— « Senher, s'o sap, grat vo·n deura saber. »
		— « Toza, de trops vils faitz me fa tener. »
		— « Senher, per so n'es lauzan mentaugutz. »
		— « Toza, s'amors autre joy no m'adutz. »
	40	— « Senher, no·us par que vivatz ses plazer. »
V		— « Toza, no·m vol mos Belhs-Deportz valer,
		Ni re no vey el mon que tant me playa. »
		— « Senher, ben cre que·n sap far son dever
		Si a valor, tant quo dizetz, veraya. »
	45	— « Toza, tan val que totz m'en desesper. »
		— « Senher, avetz per lieys nul melluyrier ? »
		— « Toza, oc, tal que n muer de dezirier. »
		— « Senher, ans n'es mentaugutz de saber. »
		— « Toza, que·m val, pus joy no·n puesc aver? »
	50	— « Senher, loy jo perdetz per cor leugier. »
VI		— « Toza, ·l cor ai leyal e vertadier
		Vas lieys, don mortz deziran me guerreya. »
		— « Senher, tant aug dir d'En Guiraut Riquier,
		Que, si no·us val, no fa ren que no deya. »
	55	— « Toza, no fan a creire lauzengier. »
		— « Senher, per mi sai tot vostre talan. »
		— « Toza, be·us am, mas vos m'anetz trufan. »
		— « Senher, autra n'ametz atertant yer. »
		— « Toza, vau m'en que no m'avetz mestier. »
	60	— « Senher, anatz et veja·m vos autr'an! »