Meyer, Paul. Les derniers troubadours de la Provence d'après le chansonnier donné à la Bibliothèque Impériale par M. Ch. Giraud. Paris: Librairie A. Franck, 1871.

Code: 427,003 Auteur: Rostaing Berenguier de Marseilla Genre: Estampida Numero: X, 4

La dousa paria

		Mesier ROSTAINH BERENGUIER. (f. 33 v°)
xxiij.
I	1	La dousa paria
		De ma bell’ amia
		Mi ten nueg e dia
		Alegr’ e joyos
	5	Tant qu’autra que sia,
		Tant ha gran cumdia,
		Non vuell ni penria
		Nin suy enveyos ;
		Quar ha cara
	10	Beutat clara
		E cors grasios,
		Plasen cara,
		E l’ampara
		Fins pres precios.
II	15	Tant es yen complida
		D’aut pres que la guida
		Per quem ten a vida
		Et autra non vuell.
		Pros ez eissernida,
	20	De tot ben guarnida,
		Ab valor grazida,
		Plazens ses erguell,
		Agradiva,
		Senhoriva
	25	En tot so que tainh,
		On s’abriva
		Valor viva,
		Que res no y sofrainh.
III		E si mon corage
	30	Y met ni assage
		D’aver alegrage
		Del sieu gen cors car,
		Gentil d’agradage,
		De plasen estage,
	35	Non cre far follage
		Car non li truep par.
		Non fai failla
		Qui treba[i]lla
		Per donna valen ;
	40	Conque sailla
		E trassailla
		En plus d’onramen.
IV		Mos cors non remira
		Ren als ni desira
	45	Ni plus non cosira
		Nueg ni jorn languen,
		Ni plus non albira
		Si non m’a en ira
		Mas quo nocz regira
	50	Ves mon languimen.
		Pos semblansa
		D’alegransa
		Mi fay gayamen,
		Que l’avansa
	55	Li balansa
		D’un doucz jauzimen?
V		Sim fezes valensa
		Sos cors qu’ades jensa
		Fera conoissensa
	60	E fora devers ;
		E li gran bestensa
		Mi ten en temensa
		Que li mortz non vensa
		So qu’es mos volers.
	65	Si plus tarda
		Que plus m’arda
		Le gran fuocz que m’art
		Er musarda
		Tota guarda
	70	Que de mort mi guart.
VI		Reire guarda
		Ni enguarda
		En neguna part
		Non fan tarda
	75	Que non m’arda
		Mi dons ab s’esguart.