Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,069a Auteur: Giraut de Bornelh Genre: Canso Numero: XIII

Si ja d'Amor

I	1	Si ja d’Amor
		Pogues aver lauzor
		Ni gazardo ni grat,
		No m’a tan malmenat
	5	Qu’enquera no·lh servis.
		E si mos precs auzis,
		No pot pensar cor ni bocha retraire
		Los gauchs e·ls bes c’auri’adonc! Diatz,
		Pos de l’auzir seria tan paiatz,
	10	De so befach que·us seria veiaire ?
II		E si·m socor
		Vostre cors cui onor
		Tan que·l meu n’ai donat,
		Aissi com per orat
	15	M’auretz, so vos plevis,
		C’anc mais d’altr’om no vis
		Tan grans esfortz, de negu nat de maire !
		Qu’eu servirai los estranhs e·ls privatz
		E serai fols et ad oras senatz
	20	Ad oras gais et ad oras pensaire.
III		E ja temor
		No n’aiatz qu’eu alhor
		Mais vir ma volontat;
		Que tot aurai trobat
	25	So que totztems ai quis
		E serai vos tan fis
		Que·ls enemics ponharai en desfaire
		Et als amics serai dolz e privatz ;
		Aital m’auran, si vos m’o comandatz,
	30	Li mal ab mal e·lh bon ab ben a faire.
IV		A de ricor
		El mon emperador
		Que valgues la meitat ?
		Non ! a·i pauc galiat !
	35	Qu’el mon non a faitis
		Cors que melhs m’abelis.
		Ai ! francha res, corteza de bon aire !
		El mon non es emperis ni renhatz
		Que contra vos no·m fos grans paubretatz,
	40	Et ab sol vos seria emperaire !