Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,009 Auteur: Giraut de Bornelh Genre: Canso Numero: XV

Amors

I	1	Amors,
		E si·m clam de vos,
		Sera·us onors ?
		No, per ma fe,
	5	Car no·s conve,
		Desqu’en vostra mantenensa
		M’aviatz,
		Qu’era·m gecatz,
		Ans pensatz
	10	Com cela·m volha
		Cui eu volh!
II		S’acors
		No·m fai, ve·us me jos ;
		C’una dolors,
	15	Que·m sobreve,
		Me vira·l fre
		Vas leis, si noca l’agensa
		C’om que·lh platz
		Sia chazatz.
	20	N’ai ? Si·m fatz :
		Can que m’acolha,
		Pro m’acolh.
III		Folors
		Fo ma sospeissos
	25	C’a trop melhors.
		No sofre re
		Cudar de se ;
		Be fatz doncs fol’atendensa ?
		Trop viatz
	30	Me sui chamjatz ;
		No·n diatz
		Qu’ela·s me tolha,
		Qu’eu la·m tolh.
IV		Pluzors
	35	Vetz sui consiros
		E·m pren paors
		Qu’en pert l’ale,
		Can me sove
		C’a me falh e me comensa
	40	Frevoltatz
		Que·m tolh solatz.
		Grans pechatz
		Er qu’eu me dolha,
		S’eu m’en dolh.
V	45	E sors
		Anc res que jois fos
		Leu ni de cors?
		Egal ab me,
		Qu’era·m n’ave,
	50	En esmai etz en parvensa,
		C’oblidatz
		M’er soans fatz !
		N’er intratz.
		Ans que·l rams folha
	55	Port e·s folh ?
VI		Era, can sui en Proensa,
		Vau mesclatz
		Entr’ir’e patz
		E sapchatz
	60	Del joi qu’i brolha
		Quez eu brolh !