Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,018a Auteur: Giraut de Bornelh Genre: Canso Numero: XXXVII

Be deu om chastian dire

I	1	Be deu om chastian dire
		Al seu amic umilmen
		So bo conselh drechamen,
		Can el fai desmezuransa,
	5	Si tot no·lh platz c’om o dia.
		Car qui ve l’ amic falhir,
		Tazen lo fai enardir ;
		Amdui falhon d’un’esmansa,
		L’ us que tatz, l’altr’a malfaire.
II	10	Pero no serai sofrire
		Qu’eu no·us dia mo talen
		D’aisso don om vos repren,
		Si tot n’avetz greu pezansa.
		Car legen o trobaria,
	15	Amors, om no·s deu sofrir
		De dir, si tot so li tir,
		Re que porta benanansa
		A l’amic cui es amaire.
III		E car sui vostre servire,
	20	Dic vos be seguramen :
		On plus trobatz fi sofren,
		Plus a de vos malanansa.
		Be cre c’aiatz companhia
		Ab aquel c’om no deu dir
	25	Et ab datz que fan languir
		Totz cels que segon lor dansa,
		On cre que·us siatz tuch fraire.
IV		Per Deu, volhatz mo martire
		Adolcir e mo tormen,
	30	Car ma domna no·m consen,
		A cui port leial amansa.
		Eu cre be qu’ilh o volria,
		Mas no pot ges trassalhir
		Vostre coman, so m’albir ;
	35	Car plus l’avetz en possansa
		Que non a so filh lo paire.
V		Si de leis no sui jauzire,
		E·us dic tot apertamen :
		Vostr’onors vai descreissen,
	40	Car avetz falsa semblansa.
		Pos c’om vos serf en fadia,
		Be degra totz om fuir
		Vos onrar ni gen servir ;
		Car servizis non enansa,
	45	S’om no n’es gazardonaire.
VI		Enquera pogra jauzir,
		Si de leis que·m fai languir,
		Amors, me donatz fiansa,
		Qu’es la genser de bon aire.
VII	50	A, amics, val m’esperansa ?
		Poi’en vos e mon afaire !