Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Code: 293,029 Auteur: Marcabru Genre: Pastorela Numero: XXIX

L'autrier, a l'issida d'abriu

I	1	L'autrier, a l'issida d'abriu,
		En uns pasturaus lonc un riu,
		Et ab lo comens d'un chantiu
		Que fant l'auzeill per alegrar,
	5	Auzi la votz d'un pastoriu
		Ab una mancipa chantar.
II		Trobei la sotz un fau ombriu :
		« Bella, fich m'ieu, pois Jois reviu
		. . . . . . . . . . .
	10	Ben nos devein apareillar. »
		— « Non devem, don, que d'als pensiu
		Ai mon coratg' e mon affar. »
III		— « Digatz, bella, del pens cum vai
		On vostre coratges estai? »
	15	— « A ma fe, don, ieu vos dirai,
		S'aisi es vers cum aug comtar,
		Pretz e Jovens e Jois dechai
		C'om en autre no·is pot fiar.
IV		D'autra manieira cogossos,
	20	Hi a rics homes e baros
		Qui las enserron dinz maios
		Qu'estrains non i posca intrar
		E tenon guirbautz als tisos
		Cui las comandon a gardar.
V	25	E segon que ditz Salamos,
		Non podon cill pejors lairos
		Acuillir d'aquels compaignos
		Qui fant la noirim cogular,
		Et aplanon los guirbaudos
	30	E cujon lor fills piadar. »