Anglade, Joseph. Poésies du troubadour Peire Raimon de Toulose . Toulouse: E. Privat, 1920

Còdi: 355,006 Autor: Peire Raimon de Tolosa Genre: Canso Numero: [V]

De fin'amor son tot mei pensamen

I	1	De fin'amor son tot mei pensamen
		E mei desir e mei meillor jornal
		E pres d'Amor voill aver mon ostal,
		Per so car fis ab fin cor finamen
	5	Li·m sui renduz, setot ben no m'acoil;
		E ges per tan de leis servir no·m toil,
		Setot son greu e perillos li fais
		Qe fai als seus sovent Amors sofrir.
II		Pero m'a fait Amors tan d'onramen
	10	Qe mai e mels ab ferm cor natural
		Am qe nuls hom; ni non dic qom ni qal,
		Tot per paor de malvais parlamen;
		Mas lo dolz ris e la faz e·ill beil oil
		E sa faichos plaisenz de bel escoil
	15	E·l gai solaz e·l gen parlar no·m lais
		Mostra[r] quals es a cel qi sap chausir.
III		E car tan son vostre ric faiç valen,
		Humils temen vos port amor coral;
		Q'el mon non a amador tan leial
	20	Qom eu vos sui, dompna, ses falimen.
		E sai qe faiz ardiment et orguoil,
		S'eu dic qe·us am, per qe·s taing q'eu en moil
		Mos oilz soven, car anc de mi no·s tais
		Q'en tan ric loc per amar mon cor vir.
IV	25	Las! non pot hom retener son talen
		Q'ades no an lai don plus fort li cal,
		E si non a mais dolor e gran mal,
		E seg ades son mal ad escien;
		E sapiaz, domna, qe om plus mi doil
	30	Ades mi creis l'amor[s] e·l bes qe·us voil;
		C'us dolz pensar[s] plaisenz del cor me nais
		Qe noit ni jor no·s pot de vos partir.
V		No·us aus merce clamar mo chausimen,
		Car de valer no·us trob per ni egal;
	35	Pero qan hom als seus socor e val,
		Bella domna, fai son pro veramen.
		E car tenez de pretz l'auzor capdoil
		E de beltat, ades mais q'eu non soil
		Vos voil servir, et no·m part ni·m biais
	40	De vostr'onor amar e car tenir.
VI		Domna valens, mais vos désir e·us voilh
		Que tot lo on, qar fin'amors m'atrais
		Vostre bel cors don me lau de cauçir.
VII		Ser Rambertis de Buvalel acoil
	45	Prez et valor et anc jorn no s'estrais
		De granz solaz e de joi mantenir.