Anglade, Joseph. Poésies du troubadour Peire Raimon de Toulose . Toulouse: E. Privat, 1920

Còdi: 355,009 Autor: Peire Raimon de Tolosa Genre: Canso Numero: [VIII]

No·m puesc sufrir d'una leu chanso faire

I	1	No·m puesc sufrir d'una leu chanso faire,
		Pus prec e man n'ai de Mon Ereubut;
		Qu'apres lo dan e·l mal qu'ieu n'ai agut,
		Coven qu'ab joy m'esbaude e m'esclaire:
	5	Quan segon l'afan
		Qu'ai sufert tan gran,
		Non agra razo
		Qu'ieu cantes oguan;
		Mas quar fin'amors
	10	Mi mostr'e m'ensenha
		Que·ls mais no·m sovenha
		E torn en mon chan,
		Farai derenan
		Un non chantaret prezan.
II	15	Anc per ren al de mon major maltraire
		De tan bon cor non desirey salut,
		Mas sol qu'a lieys cui Amors m'a rendut
		Pogues ancar servir, petit o guaire;
		Quar tot l'autre dan
	20	Non prezera un guan,
		S'ieu moris o no,
		Sol leis pogues tan
		Servir que l'honors
		Ar parra que·m fenha
	25	Per qu'ela m'estenha
		Que non digu'enan;
		Mas al sieu coman
		Sui e serai on qu'ieu m'an.
III		Las! que faray, pois non li aus retraire,
	30	Ans quan la vey, estau a ley de mut;
		E per autruy no vuelh sia saubut,
		S'aqui mezeis sabi'estre emperaire.
		A Dieu mi coman
		Cum vau trebalhan;
	35	Qu'ab la sospeisso
		N'aurai atretan,
		Quar tan grans ricors
		Non cug que·m n'avenha;
		Mas vas on qu'ieu teinha,
	40	Fis e ses enguan
		L'amarai quad'an,
		De jorn en jorn melluyran.
IV		Que·l cors e·l cor e·l saber e·l vejayre
		E l'ardiment e·l sen e la vertut
	45	Ai mes en lieys e non ai retengut
		Ni pauc ni pro per negun autr'afaire;
		Ni als non deman,
		Ni vau deziran,
		Mas que Dieus me do
	50	Vezer l'or'e l'an
		Que sa grans valors
		Tan vas mi·s destrenha
		Qu'en mos bratz la seinha,
		E qu'ieu, en baizan,
	55	Tot al mieu talan
		Remir son cors benestan.
V		Ai! franca res, cortez'e de bon aire,
		Merce n'ajatz que veus m'aissi vencut;
		Qu'aissi vos ren lo basto e l'escut,
	60	Cum selh que plus non pot lansar ni traire:
		Vostr'huelh belh truan
		Que tot mon cor m'an
		Emblat, non sai co,
		No·m van confortan.
	65	Ja castels ni tors
		No·us cugetz que·s tenha,
		Pus gran forsa·l venha,
		Si secors non an
		Sylh que dins estan:
	70	Mas a mi vai trop tarzan.
VI		Esta chansos vuelh que tot dreg repaire
		En Arago, al rey cuy Dieus ajut;
		Que per lui son tug bon fan mantengut,
		Plus que per rey que anc nasquet de maire:
	75	Qu'aissi·s vai trian
		Sos pretz, e s'espan
		Sobr'autres que so,
		Cum sobre·l verjan
		Fai la blanca flors:
	80	Per qu'ieu on que·m venha
		Ades crit sa senha,
		E vau razonan
		Son pretz, e non blan
		Duc ni rey ni amiran
VII	85	Et ab ma chanso,
		Enans qu'alhor an,
		M'en vau lai de cors
		On Jois e Pretz renha,
		E vuelh que l'aprenha,
	90	Cobletas viulan,
		E puois en chantan
		De qual guiz'hom la·i deman.