Almqvist, Kurt. Poésies du troubadour Guilhem Adémar. Uppsala: Almqvist &Wiksells Boktryckeri, 1951

[CdT en procés d'incorporació]

Còdi: 202,010 Autor: Guilhem Ademar Genre: Canso Numero: III

 Pos vei que reverdeja·l glais

I	1	Pos vei que reverdeja·l glais
		Lonc la fontaina qu'esclarzis,
		E colora de sol lo rais
		Lo mon, per que s'enbelezis,
	5	Don par flors e fruitz e fueilla,
		E l'auzel chanton volontier:
		Ez ieu d'amor, quar m'a mestier
		Que meils que no sol me vueilla.
II		Car ben fora sazos hueimais
	10	Que ma volontat obezis
		Cela per que·m floris lo cais,
		Tant vai ves lai sers e matis.
		Ez on plus vas mi s'ergueilla,
		Ades mi dobla'l dezirier;
	15	Ez on mais n'ai de destorbier,
		Mos volers plus nais e brueilla.
III		[Ai], aitan dousamen mi trais
		Sa boca rizen, quan me dis
		Qu[ez] eu li fos fins e verais:
	20	« Autr'amor Dieus no·m consentis!» -
		Mas ara'm cug que·s destueilla,
		Coras que tengues dreit semdier.
		Be soi donx fols s'autra non quier,
		Que mos volers mel[s] m'acueilla.
IV	25	Lo jorn volgra fos part Roais,
		En caitivier de Sarrazis,
		Que leis ni sos pensars m'atrais;
		Quar tan mal desmen sos pairis.
		Ben ai razo que m'en dueilla
	30	Car anc no creziei cast[ï]ier;
		Qu'el'a·l costum de l'aversier
		Qui·l sieu destrui e desbrueilla.
V		Dieus me do poder qu'ieu m'en lais!
		Qu'e tan salvatj'ora me·i pris
	35	C'anc no nasquet - ni·nquera nais -
		Hom que tan fort en fol servis.
		[De] maint semnat pauc cug cue[il]la,
		Qui se[m]n'ab aital parsonier
		Que del mueg penri'un sester:
	40	Tan dopti que tot m'o tueilla.
VI		Pero si vol que·n sia plais,
		Tu·l me vai dire, bels amis,
		Qu'ieu lai irai ans qu'iesca mais!
		Que no dezir tan paradis
	45	Qu'eser lai on si despueilla.
		Aiso·l me jura, messatgier,
		Enan aia talan leugier
		[- - - - - - -] acueilla.