Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Codi: 457,036=310,003 Autor: Uc de Sant Circ, Nicolet de Turin Gènere: Cobla avec tornada (et réponse) Número: XLI

 

Si ma dompna n'Alais de Vidallana / N'Uc de Saint Circ, sabers e conoissenza

		NUC DE SANSIL.
I	1	Si ma dompna n’Alais de Vidallana
		Saubes cant eu sai a dompna valer,
		Ni cum eu sai far semblar sobeirana
		Tota dompna qu’eu voilla mantener,
	5	Ja no·m fora de solatz tan loingtana
		En son païs cant eu l’anei vezer.
		S’il no m’onret, oranz ai en Breissana
		Na Donella, que·s fai a totz plazer
		Ab cortes dichz et ab valor certaina.
II	10	Na Salvaga, d’aitan siatz certaina,
		Qe l’onramenz de vos me fai plazer
		Lombardia e la Marcha e Toscaina.
		NICOLEZ DE TURRIS L[I] R[ESPONDET] :
III		[N'Uc de Saint Circ, sabers e conoissenza
		Tolc a n’Alais car no·us ac bel solatz ;
	15	Car c’il en vos conoges la valenza
		Ni lo saber qe vos aver cuidatz,
		Ben mostrera tan bela captenenza
		Qe totz temps mais en foratz sos paiatz.
		Mas il no·us vi tant d’art ni de sabenza
	20	Qe de dompnas tant de be dir saçatz
		C’aian granz laus per vostra mantenenza.
IV		Na Donella sai qe·n a penedenza
		Car vos onret, e Salvaga no·m platz
		Car vos acuoill ni·us fai bella parvenza.]