Niestroy, Erich. Der Trobador Pistoleta. Halle a. S.: Verlag von Max Niemeyer, 1914.

Codi: 372,008 Autor: Pistoleta Gènere: Canso Número: VI

 

Se chantars fos grazitz

I	1	Se chantars fos grazitz,
		si cum sol, ni solatz,
		be·m tengra per faillitz
		qar tant m’en fui tarzatz ;
	5	mas chanz non ac saizon,
		pueis lo reis d’Aragon
		muric ni·l reis n’Anfos
		e si per leis non fos
		cui sobt’ altras res blan,
	10	non chantera ugan.
II		Anz m’era relinqitz
		totz e desconortatz
		e d’alegrier geqitz
		e de dompnei loignatz ;
	15	mas amors me somon
		qe·n fassa ma chanzon
		e q’ieu torn e ioios
		e gais et amoros ;
		e m’esfortz derenan
	20	a lei de fin aman.
III		Q’om iratz ni marritz
		non par d’amor privatz ;
		anz sembla deschauzitz,
		se tot s’es ensegnatz ;
	25	pero fai falison
		cel qi trop d’ira·s don,
		q’ira fai d’un dan dos,
		zo es sos gazardos ;
		et amors vai tot l’an
	30	als seus gaugz perchassan.
IV		Hai Dieus ! cum es garitz
		qi am’ e es amatz
		e iau e es iauzitz,
		don si ren per pagatz ;
	35	mas cel q’am’ en perdon
		et anc amatz non fon,
		deu viure conziros ;
		mas ieu non sui clamos,
		anz sufr’ en patz l’afan
	40	et am ses tot enian.
V		Hai ! bels cors gen bastitz,
		plazenz e deziratz,
		de totz bos aibz complitz !
		vailla·m merces, si·us platz,
	45	ab vos de cui hom san,
		qe d’altras non razon
		ni non sui enveios ;
		domna, eu·m rent a vos,
		per far vostre coman
	50	totz temps, vas on q’ieu an.
VI		Deus confonda ugan
		orgoil e cels q’eu fan.